Las Notas de Matilda – Konseja: ELIAU ANAVÍ I SU KAL

ELIAU ANAVÍ I SU KAL

Uno de los kuatro Kales de los sefaradís de la Sivdà Vieja de Yerushaláyim tinía dos nombres: «Talmud Torá» i «Eliau Anaví». Purké?

Al tiempo ke no avían shkolas en Yerushaláyim, uzavan este Kal komo Talmud Torá i este era su nombre.
Afitaron tiempos ke los ombres se fuían de la sivdá, purké los turkos los anferravan para meteldes pechas o darles lavores.

Afitó un Kipur ke no avía minyán en el Kal «Talmud Torá». Bushkaron por akí, bushkaron por ayá, i no stavan topando.

End’una, a la ora orada, se les aparesió un viejo, ansí se kumplió el minyán.

En saliendo de Kipur este viejo se desparesió. De ayí supieron ke era Eliau Anaví.

Agora en este Kal ay una kamaretika, ke se yama «la kamaretika de Eliau Anaví», purké ayí se aparesió Eliau Anaví.

Kontado por YAAKOV ELAZAR – 1991
Notado i redaktado por MATILDA KOEN-SARANO

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…