eSefarad Noticias del Mundo Sefaradi
No tiene lugar
Un djudió se murió i suvió arriva. Le vino enkontro un ándjel i le demandó: «Ande estás indo?»
Le disho él: «Al gan-eden!»
Le disho el ándjel: «Un minuto: yo kale ke mire en las listas. Komo te yamas?»
«Moshé» le disho el ombre.
El ándjel bushka, bushka, bushka en todas las ojas… su nombre no está.
Le disho el ombre: «E, kualo ke aga?»
Le disho el ándjel: «Vate al geinom.»
«Bueno, no tengo remedio».» le disho el ombre, i fue para entrar al geinom.
A la entrada un diavlo lo kedó i le disho: «Un minuto, komo te yamas?»
«Moshé»
El diavlo bushka, bushka, bushka, no topa este nombre en la lista.
Le dize: «No puedes entrar!»
Le disho el ombre: «A mí no me emporta ande vo estar, ma yo ande mi mujer no torno!»
Kontado por MALKA KALDERON – 2014
Raduizido por MATILDA KOEN-SARANO
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
