Las Notas de Matilda – Kuento: Suegras

Suegras

Kaminaron dos utumubilis en un paseo muy ermozo, ama al kavo se skapó kon una teuná[1]. Eran dos utumubilis: uno de suegras, uno de nueras.

Ken se firió? Las esuegras! Las nueras kidaron beséder[2].

Una de nueras empisó a yurar, a yurar, a yurar…

Le disheron: “Diké stas tanto yurando?”

“Sto yurando ke haval[3] ke mi suegra no se topó en este utumubil. Ya vino eya, ama al minuto d’al kavo s’arripintió de suvir!”

——————————

[1] teuná (e.): aksidente
[2] beséder (e.): en regla, bien
[3] haval (e.): pekado

 

Kontado por SARA BIJONER – 2000
Redaktado por Matilda Koen-Sarano

 

---

 

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…