eSefarad Noticias del Mundo Sefaradi
«Sinyor no kome guevo entero…»
Avía un padre ke tinía sesh ijos i penava muncho para traerles a komer.
Una noche trusho a kaza un pan i sesh guevos.
Los metió haminar, dio a kada uno una revanada de pan i un guevo i les disho: «Komé vozotros el guevo. Yo vo komer sólo el pan.»
Dizen ke los ijos no kijeron ke el padre se kedara sin guevo i kada uno de eyos le dio al padre la metá de su guevo.
I dizen ke fue el padre a dizirles: «Kada uno de vozotros ke me de la metá de su guevo,»
En una manera o en la otra se dize: «Sinyor no kome guevo entero, si no medio de kada uno.»
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
