Las Notas de Matilda – Kuento: Nona, dokuméntate!

Nona, dokuméntate!

Moshiko tiene el kumpleanyo de tres anyos. Los djenitores le azen una grande fiesta kon una  torta kon tres kandelikas i balones de kolores.

Vienen los tíos, los suvrinikos i le traen munchos regalos: balas, otomobilikas, livrikos, kutís de chokolata, chupamelas…El dize grasias a todos.

Viene la nona, le trae una ermoza kamizika. Moshiko no dize nada.

Le dize la madre: «Moshiko, dí grasias a la nona ke te trusho regalo para tu kumpleanyo.»

Moshiko mira la kamizika i dize: «Kualo? Esto es regalo para kumpleanyo?»

Kontado por MATILDA KOEN-SARANO – 2015

Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino