eSefarad Noticias del Mundo Sefaradi
Meteorolog real
Un rey kería salir a kasar, ma sikomo el klimá le paresió instable, mandó a yamar a sus meteorologos i les demandó: «Kuala es vuestra opinión? Va azer luvia o no? Yo kero salir a kasar amanyana…»
Los meteorologos izieron una envestigastión kon sus enstrumentos i disheron al rey: «No, sinyor rey, no va azer luvia.»
Ensupitó el azno del rey empesó a gritar. I gritó el día entero.
Demandó el rey a su eskudero: «Kualo tiene el azno oy?»
Le disho el eskudero ke konosía bien a su azno: «Sinyor rey, el azno esta diziendo ke amanyana va azer luvia.»
El rey no dio emportansa a los gritos del azno i salió a la kasa, ma empesó una luvia tan fuerte ke el grupo del rey tuvo de korrer a kaza.
Entonses kualo izo el rey? Dezmetió los meteorologos i proklamó al azno meteorolog del rey.
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
