eSefarad Noticias del Mundo Sefaradi
Konsejo de filozof
Un pilosof (1) savio le disho a su ijo en ora de su muerte: “Ijo mío, kuantos amigos kovrastes en tu vida?”
Díshole su ijo: “Senyor padre, kovré sien amigos”.
Díshole su padre: “Savrás, ijo mío, ke los pilosofim disheron: “No ames i no alaves a el amigo antes de prevarlo i konoserlo por sierto si es amigo. Ke savrás ke yo nasí antes de ti i no pude kovrar en toda mi vida otro ke medio amigo, i tú, komo ya kovrastes sien amigos? I agora, anda i prévalos i verás si topates ni uno”.
El klal (2) es ke los prevó i no topó ni uno ke estuvo en su preva. I tornó onde su padre i le disho: “Alkansé a saver lo ke disho el pilosof: – Munchos son los amigos sin kuenta, i en ora de el menester no toparésh otro ke pokos -”.
————————————
(1) pilosof (e.): filozof
(2) klal (e.): regla
Del “Meam Loez”, Y. Magriso (folio 115a)
(de “Antología de Cuentos Sefardíes” de Pascual P. Recuero, Barcelona, 1979, paj.72)
Transkripsión i notas de Matilda Koén-Sarano
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
Gracias,
Me gusta leer y aprender el ladino. Siento en mi corazon que los antelasados mi familia fueron sefardies conversos al catolicismo. Leer y escuchar su linda lengua me acerca a ese pasado dostante.