eSefarad Noticias del Mundo Sefaradi
El buen vizino
Moshón tiniya una ermoza huerta, i kada día kon el hortum en la mano arregava sus arvoles i sus flores. Esto era un plazer grande. Al lado de su huerta tinía un vizino. An él le agradava meldar i tenía un armario yeno de livros ermozos i jornales de todas las novedades, buenas i negras.
Se asentavan a la huerta, el uno arregava, el otro meldava.
Un día de grande luvia, non ay de arregar, va Moshón and’el vizino i le dize: «Amigo, no tengo nada de meldar, empréstame te rogo, un buen livro o jornal para oy.»
Viene el buen ombre le arresponde: «Mira Moshón, yo livros de mi kaza non kito, ama si keres meldar ven i melda akí, en mi kaza.»
Se atorna Moshón kon los mokos enkolgando…
Un día de kalor grande, stava todo seko kemando del sol. Moshón arregó bueno su jardino; todo fresko ermozo estava ande él. El vizino bushka, no topa ni hortum, ni arregador. Se va ande Moshón le dize: «Buen vizino, impréstame tu hortum ke mi huerta ya se sekó del sol grande ke está oy.»
«Ah», le responde Moshón, «yo hortum de mi kaza no kito, ma si keres arregar, ven arrega en mi huerta»
Kontado por SARA KENT -1997
Notado por Matilda Koén-Sarano
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
