eSefarad Noticias del Mundo Sefaradi
Dos repuestas
Una mujer, ke izo todos los examenes medikales i está asperando la repuesta del doktor, resive de él un telefón: «Madam, venga ande mí kon urjensa.»
La mujer ariva pishín ande el doktor i éste le dize: «Madam, tengo dos repuestas para eya. Una buena i una negra.»
«Me diga antes la buena» le dize la mujer.
«La buena es» le dize el doktor «ke tiene otras 24 oras de bivir».
«Addió!!» dize la mujer entera espantada «Me diga presto la negra.»
«La negra» le dize el doktor «es ke ayer me ulvidí de telefonarle para dizirle la buena!»
Kontado por MATILDA KOEN-SARANO – 2017
———————————————————————-
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
