Las Notas de Matilda – Kuento: Bayle de shedim

Bayle de shedim

Kuando yo me kazí tinía diiséh, diisiete anyos: era norá tseirá.
Una noche de shabat stávamos durmiendo, ki vinimos d’onde mi padre.
Mi marido uyó parese reashim del sadé: algunos tenikilikos… ken save kualo?…
I se stava kuvijando i me stava kuvijando a mí.
Demanyanika, kuando vino mi madre a spertaldo para ke se vaya al kal, i mi marido le disho ke uyó alguna koza, le disho mi madre: «No ay nada. A la otra kaza ay un pozo, i bétah los shedim baylaron ayí. No tienes de kualo spantarte. De ay uyites esta baraná.»
Yo no uyí lo ke disho mi marido, ama lo ke disho eya ya uyí.
Demanyanika de shabat mos huimos a pasear i vinimos en kaza. A la noche, noche d’alhat, mos vistimos pidjamas i mos enkashimos a la kama.
El s’abolta, yo m’abolto, él s’abolta, yo m’abolto.
Al kavo le dishi: «Te digo una koza, Shimón? Vamos ande mi madre!»
No le dishi mas ni una palavra, porké se stava spantando i él.
Mos alvantimos, mos vistimos i mos huimos ande mi madre.
Dimos a la puerta, salió mi padre: «Ke? Ke haber?»
«Mos stamos espantando de durmir en kaza!»
«Oh, oh, oh! Simha, alevanta! Se stan espantando!» disho mi padre.
Sesh mezes mos echimos ensima del mesabé de la ventana. Ay mos izo kama mi madre i ay mos durmimos sesh mezes.
Kada vez ke kiríamos un vistido, alguna koza, entrávamos en muestra kaza komo ladrones, tomávamos el vistido i mos fuíamos, no sea ke mos anferrara algún shed, asta ke vino el Muharrén. El Muharrén era el tiempo ke trokávamos kaza.
Kontado por MALKA LEVY – 1988, Yerushaláyim
Notado i redaktado por MATILDA KOEN-SARANO

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…