eSefarad Noticias del Mundo Sefaradi
La kamareta vazía
And’avía de ser de un rey ke disho ke va dar un premio valutozo a ken va saver inchir una kamareta vazía, no emporta de kualo, ma deve estar kompleramente yena.
Vino uno, disho: «Yo lo vo azer!» Se fue, vino kon kargas, munchas kargas de paja i inchó la kamareta entera.
Vino el rey, miró i miró i disho: «Ya es verdá ke inchites toda la kamareta, ma, mira, kedaron lugares vazíos entre las pajas. Me desplaze, ma no puedes resivir el premio.»
Vino otro, disho: «Yo vo inchir la kamareta.» Fue i trusho botas, munchas botas de lodo i inchó la kamareta, ma ni él no reushó a inchirla kompletamente, porké kedaron kantones vazíos.
«No!» disho el rey, «Ni tú no reushites.»
Vino el treser i disho ke él la va inchir. «Veremos…» le disho el rey.
El ombre fue, trusho 20 kandelas godras i las ensendió todas en medio de la kamareta.
La luz alelumbró la kamareta entera, asta los mas chikos kantones.
«Bravo!» le disho el rey, «Tú reushites a inchir la kamareta entera!» I le dio el premio ke prometió.
Kontado por MATILDA KOEN-SARANO – 2016
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
