Las Notas de Matilda – Komedia: La gerra del ajo i la sevoya

La gerra del ajo i la sevoya

Matilda Koén-Sarano

Komedia – 2015

Personajes:

• Mara (de 75 anyos, personaje enventado)
• Dora  (de 70 anyos, dita)
• Flora   (de 80 anyos, dita)

Lugar: Una Kaza de Ansianos – En un kualker paíz del mundo
Tiempo: La demanyana – La tadre

Demanyana

Mara (se asenta a la meza delantre de un plato de dientes de ajo krudo): Ah, komo me plaze el ajo! I aze tanto bien a la salú! (empesa a komérselos a uno a uno. Se espande una golor terrible de ajo). (Al lado de eya ay una grande tavá de fierro*): Agora vo eskapar de komer i vo ir ande Flora. Me va sintir! (Eskapa de komer, toma la tavá i sale de su kamareta). (Da a la puerta de Flora): Flora, ávrime!

Flora (avriendo): Ke keres?

Mara (alevantando la tavá): Mira ke te do la tavá en la kavesa, si kontinúas a azer fritadas kon sevoya kruda en la kamareta. Ya me vo murir del guezmo!

Flora (se aze blanka, no le responde i serra la puerta, entera espantada): El Dio ke mos guadre de esta loka atavanada!

Mara (va a la puerta de Dora i batea): Avrime la puerta, Dora (kon la tavá alevantada).

Dora (avre la puerta i la veye): Ke keres, Mara?

Mara (alevantando la tavá): Mira ke si kontinúas a komer sevoya kruda, te do la tavá en la kavesa! Ya no puedo mas del guezmo!

Dora (le serra la puerta en la kara): Ya te atakano yo! Yo no me espanto de ti!

Tadre entre dos luzes

Dora i Flora (están en un kantón del korridor kon una tavá a kada una en la mano).

Dora: Agora, agora va pasar Mara. No te espantes, estamos en dos!

Mara (pasa, las dos saltan i la aferran): Deshame, kualo kerésh?

Dora i Flora (la tienen estrecha i alevantan las tavás): Agora verás!

Mara (yena de espanto): Deshame! Deshame!

Dora (i Flora, kon las tavás  alevantadas): A, agora deshame? Te vamos a deshar a una kondisión. No, a dos kondisiones: ke mos deshes azer fritadas komo mos agrada i komer sevoya kruda kon repozo, i ke no komas mas ajo, ke ya mos fedió.

Mara (yorando): Azé lo ke kerésh, ma yo no puedo estar sin ajo! Me plaze tanto!

Dora i Flora (endjuntos): Vites?! I mozotros no podemos estar sin fritadas i sin sevoya kruda! (I kedan kon las dos tavás alevantadas).

Dora, Flora i Mara (ensupitó se miran i empesan a riyir. Las tavás se desparesen):Ayde, ya abasta kon estos kalavasalikes! Agora vamos a bever un kafé endjuntos!

FIN

• Plancha para kuzinar

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…