Las Notas de Matilda – Kantadores de la tradisión djudeo-espanyola: Ofri Eliaz

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

Ofri Eliaz
Kantadora i múziko-terapista
(Yerushaláyim)

Ofrí Eliaz nasió en Afula (Israel) i pasó su chikez en el nord de Israel. A la edad de 10 anyos se transferó kon su famiya a Yerushaláyim, ande pasó la mas parte de su adolesensia en el Liseo de Artes. Durante su servisio militar eya aparesió komo kantadora, akompanyada por un tanyedor de gitarra. Después del servisio militar  pasó un anyo en la Eskola Rimón para Múzika kontemporánea en Ramat Hasharón.
En el 1997 se fue a New York para estudiar múzika i múziko-terapía. Ayá resivió su primer títolo en performasia de múzika jazz de la «Mannes School of Music» i su máster en múziko-terapía de la «New York University». Durante estos anyos eya lavoró komo muziko-terapista en varios sentros de hazinos mentales, de kriaturas i de personas retardatas,  i  aparesió en todos los Estados Unidos kon un programa de kantes en ladino i en ebreo. Sus aparisiones en los Estados Unidos fueron munchas i varias; eya kantó en New York, Washington, Philadelphia, Chicago, Atlanta, Charleston i mas, i tuvo performasias de múzika en ladino kon el «Sahar Enseble» i kon un duo muzikal.
En el 2003 Ofrí tornó a Israel i publikó  su primer CD de kantigas en ladino «Ya salió de la mar», kon el akompanyamiento de muzisianos famozos de New York. Aparesió en varios programas de radio i  de televizión, i agora está kontinuando apareser i a okuparse de múziko-terapía. Entremientres está arrekojendo material para su próksimo albom de kantes en ebreo. Eya tanye el piano i  la gitarra. En Israel  aparese kon varios muzisianos. Sus programas enkluyen kantigas en ladino i en ebreo. Su programa de kantes en ladino enkluye la bayladera de flamenko Merav Reuven i la kontadera de kuentos sefaradís Matilda Koén-Sarano. En el 2003 resivió una beka komo «Artista Ekselente» del Ministerio de la Absorbsión en Israel.  En el 2004  partisipó al Festiladino, kompetisión de kantigas muevas en ladino, en el Teatro de Yerushaláyim. El evento azía parte del Festival de Israel, ke tiene lugar kada anyo en Yerushaláyim. Entre el 2004 i el 2005 Ofrí ensenyó téknika vokal en el Konservatorio «Yad Charif». Agora  lavora komo múziko-terapista kon adolesientes a rizgo en eskolas para le edukasión spesial en Yerushaláyim, mientres ke entre el 2004 i el 2007 lavoró komo múziko-terapista kon kriaturas autistas en una eskola para edukasión spesial en Yerushaláyim, i del 2003 al 2004 lavoró en el sentro «Variety» kon kriaturas de menesteres spesiales.
Disho Ofrí Eliaz «… Sigún mí el ladino es antikas arias i melodías enkantadas, ke surbivieron a  tiempos sin fin. Es la koneksión de una madre ke kanta a su ija, una jenerasión después de la otra, konservando la erensia del puevlo djudeo-espanyol…»
Ofrí es «una kantadera kon una boz de miel» disho Chaim Acherim en el Desembre 2004.