Las Notas de Matilda – Kantadores de la tradisión djudeo-espanyola: Odelia Dahán

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

Odelia Dahán
Kantadora i kompozitora
(Yerushaláyim)

Odelia Dahán nasió i bive en Yerushaláyim. Es kantadora i autora kreativa de kantigas, es spikerina en la radio i moderatora en la T.V. Ganó del primer premio en el Festiladino 2004, la sigunda  kompetisión internasional de kantigas muevas en ladino. Eya arivó al primer lugar kon la kantiga «Déshame entrar»: palavras de Odelia mizma i melodía del kompozitor nasido en Israel, Ofer Ben-Amos, Profesor Asosiado de Múzika  en el «Colorado College» en los Estados Unidos. En el Festiladino del 2006 Odelia prezentó la kantika «Debasho de tu balkón» (palavras i múzika de eya mizma), ke  fue kantada por Sima Amiel i arivó a la final de la kompetisión. El ladino  fue prezervado atraverso las jenerasiones por las komunitás djudías en varios paízes del Imperio Otomano, en Nord Afrika i en Israel. Los ladino-avlantes prezervaron una splendida erensia muzikal, kon una larga i glorioza istoria, asta muestros días. Odelia Dahán bive i lavora en Yerushaláyim. Es spesializada en kantes en ladino, komo en múzika latino-amerikana. Eya tiene un B.A. en literatura espanyola de la Universidad Ebrea de Yerushaláyim i está estudiando agora para el M.A. en el departamento de muzikolojía de la mizma Universidad. Odelia tiene performansias en kantes en ladino, además de su programa latino  i el programa de salsa kon un grupo muzikal. Agora eya está lavorando sovre un muevo CD: una koleksión únika de kantes populares revifikados, ande ay i kantigas kompozadas por eya mizma en ladino, en kolaborasión kon el muzisiano Ittai Rosebaum i el grupo  «The Yellow Submarine Jazz Ensemble».
Odelia Dahán kon en «Yellow Submarine Ensemble» kitaron resientemente endjuntos  el CD «Solika» kon aranjamientos de jazz de las kantigas tradisionales en ladino. Estos aranjamientos, echos por el kompozitor  Ittai Rosenbaum, son una kompozisión endipendiente, ke inkórpora los semples i grasiozos kantes en ladino. Estas piesas tienen sus efluensa de varias raízes muzikales: la tradisión de  los kantes en ladino al derredor del Mediteráneo, la múzika klásika del siglo  XX, komo Bartok i Stravinsky, la múzika espanyola i latina, i sovre todo el jazz.
I sovre el «Israeli Latin Groove»: Odelia Dahán kon este grupo  de salsa yerushalmí, produsido por el pianista de jazz Zohar Kahila (miembro de pasado i famozo primer  grupo latino «Atraf»), selebra 7 anyos de performansias i lavoro komún.  Es un espektaklo erozivo i dinámiko, ke prezenta una meska de ritmos latinos, komo el jazz latino, la múzika kubana, la salsa, el chacha cha i el guahira mambo.
Odelia Dahán es kazada kon  Zohar Kahila i tiene una kriatura.