eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.
Nitza Termín
(Israel)
Nitza Termín es una kantadera ke tiene una boz de kontralto spesialmente basha, keynte i entrenante. Tiene el B.A. en muzikolojía de la Universidad de «Bar Ilán». Nitza fue la solista de la «Laakat Pikud Adarom. Después del servisio militar gravó diezenas de kantes i romansas en ladino para «Kol Israel» para Yoel Rekem i Moshé Shaúl, para salvaguadrar esta ermoza kultura. Eya izo suvir a la shena asta agora 4 espektaklos muy reushidos, el último de los kualos – «Ahavá Tzoanit» (Amor Jitano) viene reprezentado en estos días en todo el paíz. Eya kitó dos albomes. El uno «Una kaza potugeza» (1992), inspirada a los kantes del fado de Amalia Rodrigez. El sigundo «Nefeli» (Nuve) (1999), del kual fueron tranzmetidas munchas kantigas. En el 2001 dio a la radio a tranzmeter los síngolos «Mul ayam» (Enfrente de la mar) i «Ktifá sh.horá» (Velur preto), ke tuvieron un alto número de tranzmisiones. Nitza avla el ladino perfektamente. Además eya resivió la propozisión de un kontrato de gravasiones en Almania. Eya enterpretó además la kantiga del filmo dokumentario de Djeky Barkan «1943 –El anyo pedrido», en ebreo, inglés i fransés. El filmo trata de aspektos de la Shoá. El filmo fue dado en Israel i en toda la Evropa.
En el 2004 salió el CD del espektaklo «Ahavá Tzoanit» (Amor Jitano), ande eya kanta kantes jitanos. En el 2006 Nitza fue envitada en Kroatia i en los paízes del Balkán, i partisipó al Festiladino, ke tuvo lugar en el kuadro de los festejamientos del vino en Rishón Letzión.
