eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.
Joe Elias
(New York, U.S.A.)
Joe Elias era a vezes yamado el «Pete Seeger» de la múzika en ladino. Era uno de los pokos kantadores de kantes en ladino, ke nasió i kresió adientro de la tradisión oral de la múzika en ladino.
El fue a kada kantón ande ay ladino-avlantes en el mundo, sea komo interpret i sea komo arrekojedor de kantes populares en ladino, a bushkar fuentes orijinales.
El Grupo Ladino Elias es uno de los pokos grupos sefaradís, los kantadores del kual son nativo-avlantes en ladino. Eyos nasieron i kresieron adientro de la tradisión muzikal de los djudiós de Espanya, desendientes de akeyos djudiós ke desharon la peninsula Ibérika en el siglo XV.
Sus CD «Ladino lives!» es un tributo a una kultura i a una lingua únika, i al estil de kanto konosido komo «A la turka». La seleksión de los kantes en ladino fue enrejistrada del bivo en performansias en munchas partes del mundo.
No se trata sólo de la boz de Joe Elias, ma i de un buen número de virtuozos de ut, kanuún, tanbur, pandero, gitarra, klarineto i buzuki. Joe Elias no sólo kantó las kantigas kon las palavras de Jak Mayésh, ma se preokupó también de difundirlas, i izo en manera ke su nombre no venga olvidado.
Eskrivió Shlomo Alfassa en «La Florida» debasho del títolo «Múzika ke te yeva atrás a la vieja Constantinopolis»: «Komo uno ke se konsidera un konosedor del la múzika del Djudeo-Espanyol, yo pensava ke Joe Elias es sólo un otro kantador ke satisfaze mi dezeo de múzika sefaradía, ma muy presto él se izo mi artista de ladino preferado.
El lavoro de la gitarra, del ut i de los otros instrumentos, endjuntos a la boz de Joe Elias dan un armoniozo rezultado muy plaziente. No es una múzika sefaradía oksidentalizada en manera moderna, ma es una koza auténtika. El CD «Ladino lives!» es un manyífiko rekolio para sefaradís i no-sefaradís….Para ken está enteresado a oyir múzika, komo vinía tanyida por muestros padres en los días es sus viejos paízes…» (Palavras de Shlomo Alfassa).
Joe Elias murió en estos días en los Estados Unidos, (Avril 2010).
[print_link]
