Las Notas de Matilda – Kantadores de la tradisión djudeo-espanyola: Janet i Jak Esim

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

Janet i Jak Esim
(Turkía)

Janet i Jak Esim son dos kantadores, marido i mujer ke tienen del 1980 en Estanbol un grupo muzikal ke interpreta kantes i múzika sovre todo sefaradís, ma i ashkenazís, en sus kompleksa istoria  de diferensias i de similaritás.  Janet nasió en Ankara en el 1965, i Jak nasió en Estambol en el 1958.  Eyos son akompanyados por tanyedores de los mijores muzisianos de Turkía, i interpretan kantigas ke toparon atraverso sus envestigasión, komo kantigas muevas de sus kompozisión kon palavras de poetas de muestros días. Sus repertorio se kompoza de kantigas tradisionales, komo kantigas de amor, imnos, kantigas de vino, kantigas de kuna i romansas, en una armonioza kombinasión de djudeo-espanyol, turko i fransés.
Jak Esim fue grandemente enfluensado por las kantigas sefaradías ke sintió en la kaza de sus ansianos parientes de su chikez, i fue personalmente envolvido en este kanto de los anyos `70.

El interpretava kantes ke resivió de los miembros ansianos de su sosiedad kon su grupo de múzika. El introduizió  estos kantes en la sosiedad turka i en la media, kreando un duo kon Cem Ikiz al Cekirdek Sanat Evi por la primera vez en el 1985, i despertó un grande enteresamiento. Kon la partisipasión de su mujer Janet, i después de Erkan Ogur i Murat Ozbey, eyos produizieron en el 1989 sus primer album «Judeo-Espanyol Ezgiler».  De akel tiempo adisionaron otros miembros a sus grupo i  estuvieron publikando CDs. En Almania  resivieron por sus album «Sefardim I», ke inkluye dos CDs, de la German Critic Award  el titolo «The Best Folk Album of the Year». El grupo de Janet i Jak Esim prezentó la múzika sefaradía en numerozos konsertos i festivales en Turkía, en Evropa i en Israel. Eyos kontinuaron kon Herman Heder i Yahya Dai i publikaron  en el 2003 el CD «Mira», i en el 2006 el CD «Adío». En estos albomes resientes se siente la enfluensa oksidental en la kultura sefardía, ke reflekta kon sukseso las kulturas oriental i oksidental. Jak Esim prezentó por 6 mezes un programa en la Radio Acik en Turkia, ande avló de la istórika aventura de las melodías djudeo-espanyolas. Además él da konferensias, bazadas sovre sus búshkedas en el kampo de la múzika djudeo-espanyola. El grupo de Janet i Jak Esim  tuvo konsertos en Béljika, en Almania, en Olanda, en Suisa, en Israel i en Turkía (en  Estambol, Ankara i Izmir).