Las Notas de Matilda – Kantadores de la tradisión djudeo-espanyola: Gal Tamir

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

Gal Tamir
 Kantador, autor i kompozitor
(Israel)

Gal Tamir, kantador, autor i kompositor israeliano, kresió en el Kibbutz Barkai, al nord del país, en un ambiente agríkolo-kolektivo, onde empesó sus estudios de bayle i kanto, terminando kon mensión de ekelensia, en el Ulpán Le-Mahol-Menashé. 

Sirvió en el IDF (Armada de Defensa de Israel) komo paramédiko. Terminado su servisio militar, izo estudios profesionales de bayle, kanto i resitasión, en el «The Bay`s Drama Center», en San Francisco, USA.  

En el 1994 tornó a Israel, onde partisipó komo kantador i aktor, en munchas óperas muzikales, komo: «Cabaret», «Evita», «Joseph y la Maravillosa túnica a colores», «El Mago de Oz», «Grease», «Alicia en el país de las Maravillas», «‘Ladies & Gentleman», «Los Rebeldes», «West Side Story», i mas. Entre el 1995 i el 1998, izo estudios muzikales en la prestijioza «Escuela Superior de Jazz y Música Contemporánea Rimón», de Tel-Aviv, ande estudió vokalizasión i kanto, kon la Profesora Hanna Hacohen. 

En el 2001, partisipó komo solista, en el «Festival de  la Cancion Hebrea», en Tel-Aviv, patronado por la Televizión i la Radio Nasional de Israel. Al prinsipio del 2005 se produizió en el lansamiento de su primer albom muzikal, a solo, en ebreo, ke obtuvo ekselentes krítikas, i del kual produizió dos vídeos: «Muchacha ojos de papel» i «Ahshav Hásheket».

En Djulio del 2006 representó a Israel, komo finalista, en el  Universong – Primera Edisión, en el «International Music Festival», en Los Realejos, Tenerife.   En Agosto del 2006 partisipó komo finalista, reprezentando a Israel, en el «Festival No. 26 De La Canción Latinoamericana De California», en San Francisco, USA, i obtuvo el «Primer Premio – Disco De Plátino» (kon el tema :“Muchacha ojos de papel”), i también el «Tercer Premio-Disco De Plata, (kon el tema: “Dónde van?”)  en la Kategoría de Intérpretes .  En septiembre del 2006, partisipó, reprezentando a Israel, en la Sejena Edisión del «Festival Internacional De La Canción De Las Islas Canarias», obteniendo sinko mensiones de onor, i dos 2 diplonas spesiales komo interpret i kompositor. 

En septiembre del 2007 fue uno de los 3 semifinalistas seleksionados por el «Equinoccio Latin Awards of South America – Capítulo Uruguay». Dezde el anyo 2006, se topa en Santiago de Chile, onde produizió i enrejistró   su sigundo CD a solo, kon kansiones en kastilyano,  para el merkado latino, entitolado “Voluntad”, ke salió a la véndida en Avril 2008, por la «Producción Musical de Pedro Cortés». En el anyo 2008 obtuvo un diploma de ekselensia, en el «Festival No. 28 De La Canción Latino Americana De California», en la kategoría de «Pop/Baladas orijinales» kon el tema : “Y te llamé, amor…” del kual es autor i kompositor. Durante el anyo 2009 sus kansiones okuparon el primer lugar en el ranking latin/pop de las pájinas «NUMBERONEMUSIC.COM «; i en djulio del 2009 fué premiado por «Radio INDY.COM, (ke es una radio FM en Internet en USA) kon el «Premio Grindie» de exkselensia por el CD “Voluntad”. 

Del mizmo CD, el tema “Canción para la Paz” (A Song for Peace), fue seleksionado para ser parte del proyekto Internasional : “We Are The Future” (WATF) Aktualmente publikó su 3er. Cd, ke es  un lavoro muzikal sovre kantigas djudeo-espanyolas de la Edad Media, entitolado: “Romancero Sefaradí”, ke es un viaje muzikal a lo largo de la tradisión muzikal djudeo-espanyola: kantigas i poemas de la tadra Edad Media, ke kedaron komo parte de la erensia de los sefaradís. Gal Tamir interpreta esta seleksión kon ermozos arranjamientos muzikales, adaptados a muestros días, a su boz keynte de velur i a su estil personal.

Leer también el artículo: Un nuevo Álbum CD sobre canciones judeo-españolas, titulado “Romancero Sefaradí”