Las Notas de Matilda – Kantadores de la tradisión djudeo-espanyola: Gila Hasid

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

Gila Hasid
Kompozitora, pianista, kantadera
(Tel-Aviv)

Gila Hasid nasió en Tel-Aviv i de la edad de 16 anyos aparese sovre la shena komo kantadera i pianista. Es lisensiada del teatro de Tsáal en direksión muzikal i amaestramiento vokal. Izo parte de un duo muzikal de la armada. Es lisensiada de la Akademia de Múzika a nombre de Rubín en Tel-Aviv en la fakultad de konduksión de orkestra i kompozisión. Dirijió el ansambel vokal de la eskola «Rimón».  Aprontó la resitasión, el kanto, la kompozisión i los aranjamientos muzikales de la piesa para kriaturas «Mitgalgelim  bagán» (Azemos saltas en la guerta) en el Muzeo de Tel-Aviv, ke tuvo una krítika muy pozitiva.
Tuvo la direksión muzikal kon además las dekorasiones muzikales en el programa «Mesibat Gan» (Fiesta en la guerta), kon Yarón London, kon el amaestramiento vokal de las kriaturas, i de otro programa muzikal kon Eli Gornstein, Rivka Gur, Dudu  Zar, Gidón Shémer i Dalia Rabikovitz. Partisipó a nochadas para kompozitores en «Tzavta» en Tel-Aviv, ke fueron dadas por   radio i televizión, entre eyas nochadas kon Tirtza Atar, Dafna Eilat, Amitay Neemán, Natán Yonatán, Haim Barkani i mas. Aparesió en programas de jaz kon los mijores muzisianos de Israel komo en el Festival de Jaz en Eylat i otros, i es direktora muzikal de grupos de kriaturas, djóvenes i adultos.
Gila aparesió komo kantadera solista kon la Orkestra de Kamera Israelí, en el 2005, 2006 i 2008, en el Festival Klasi-Kameri, i en el  2004 en la nochada grega en el Festival de Israel. En el 2005 arivó a la final del Festiladino i kantó su kantiga kon la Orkestra Sinfónika de Yerushaláyim, i en el 2006 kantó en el Festiladino kon el akompanyamiento de la Orkestra Israelí de Rishón Letzión. En el 2009 aparesió komo kantadera solista en el programa «Inugim Klasiim» (Plazeres klásikos) kon la Orkestra Sinfónika de Hayfa.
Eya aparesió en la parte prinsipal komo kantadera i pianista en munchos espektaklos, i entre eyos «Alterman benaalé bait (Alterman en pantuflas)» (ke tuvo mas de  400 reprezentasiones), «Dulse de ladino»,  kon Margalit Tovi, Lazar Bueno i Uzi Rozenblat, i «Ritmo grego-israelí». En estos días aze parte del muy reushido espektaklo «De Salonik a Tel-Aviv» kon el mizmo komplekso.
Eya reprezentó Tel-Aviv en el Festival «Dimitria» para múzika del mundo en Salonik en oktobre 2008 kon Baldi Olier, akompanyados  por Eyal Sela i Lazar Bueno. 
Además Gila kitó un CD suyo, komo omenaje a sus djenitores orijinarios de Salonik i a Tel-Aviv de los anyos `60.
Su kantiga «Nina», ke eya kanta en ebreo  i en ladino,  arivó al kuartén lugar en el desfile de kantigas de Tel-Aviv de Galé Tzáal, en el kumplimiento de 100 anyos de Tel-Aviv.