eSefarad Noticias del Mundo Sefaradi
Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.
Las Estreyikas d`Estambol
(Estambol – 2004)
El koro de kriaturas «Estreyikas d`Estambol» fue fondado por Izzet Bana i empesó a produizirse al prinsipio del anyo eskolario 2004-2005. Oy el koro tiene 35 miembros, ijikas i ijikos de 8 a 14 anyos. «Estreykas d`Estambol» es el úniko koro de kriaturas en el mundo ke kanta en djudeo-espanyol, i es karakterizado kon el nombre de «Koro de kriaturas sefaradí». Su mas emportante objektivo de su fondasión es de azer konoser i amar la kultura djudeo-espanyola ke está desparesiendo, a la mueva jenerasión. Además las «Estreykas d`Estambol» prezentan sus kantigas en una manera tradisional i auténtika, mizmo ke no mankan kantigas muevas en sus 
repertorio. El koro se produizió durante munchas aktividades kulturales ke tuvieron lugar en los klubes sosiales de la komunidad djudía. Aún ke es un koro de kriaturas resivió un apoyo inmenso i krítikas pozitivas de todos los oyentes, i dezde su fondasión reprezenta la komunitá d`Estambol nasionalmente i internasionalmente.
El koro suvió por dos vezes a la final del Festiladino ke tuvo lugar en Yerushaláyim, i ganó la primera vez en el 2005 el treser premio kon la kantiga «Bindichos los dichos» (Palavras de Amalia Baruch i muzika de Maty Levy – México-City), i la sigunda vez en el 2008 ganó el sigundo premio kon la kantiga «Ke lo bueno de savor» de las mizmas autoras. El primer CD del koro «Un Kavretiko» es dedikado lo mas a 
las kantigas de Fiestas djudías. Los dos DVDs sigientes inkluyen todo el repertorio de las «Estreyikas», prezentado teatralmente, kon muy ermozas shenas i kon vistimientas multikolores . Topamos kon las kantigas tradisionales, melodías de Judy Frankel i Haim Tsur kon palavras de Matilda Koén-Sarano, i kantigas de Flory Jagoda i Angelo Branduardi.
Izzet Bana es el fondador, instruktor i konduktor del koro, i se dedika por munchos anyos a dirijir piesas teatrales i muzikales, en las kualas tomó munchas vezes parte komo aktor también. Izzet Bana es uno de los fondadores i kantadores del grupo «Los Pasharos Sefaradís». El fondó i el koro de adultos «Nes», ke kanta en ladino i en ebreo. El es envestigador de la múzika sefaradía, i de todo modo de múzika djudía.
El koro «Estreyikas d`Estambol» se produizió i en Espanya en formato redusido, akompanyado por Izzet Bana, kon un grande sukseso.
