eSefarad Noticias del Mundo Sefaradi
Kada martes, Matilda Koen Sarano mos konta sovre kuentos, muzika i otras kozas de su eskritura.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Ande eskonder la felisidad?
Al empesijo, kuando el mundo empesó a yenarse de djente i la djente empesó a bivir en la kreasión del Dio Santo, se reunieron kuatro ándjeles malos, ke no podían ver ke la djente biviera bien, i disheron: «Ke azer?»
El primer disho: «Devemos eskonder la felisidad.»
«Ma ande?» le demandaron los otros.
«La meteremos enriva de la montanya mas alta, i ansí dinguno no la topará.»
El sigundo disho: «No, porké un pashariko puede bolar por enriva i la puede topar i siguro ke la abashará, i kualker persona la topará. Es mijor si la echamos al fondo de la mar.»
«No,» disho el tresero,»porké un pishkado la puede komer i un peshkador puede kitar el pishkado de la mar i alguno la puede tomar. Es mijor ke la echemos enriva de las nuves i ansí dinguno no la topará.»
El kuartén disho: «Ma las nuves kaen kon la luvia, i la pueden topar.»
«I tú ke dizes?» le demandaron al kuartén.
I él respondió: «La eskonderemos en un lugar onde dinguno no la va bushkar.»
«Onde?» le demandaron.
«La meteremos adientro de kada ser,» disho él, «i la topará solamente ken savrá ir a tomarla, i ke entienderá ke la felisidad está siempre adientro de mozotros, sólo ke se deve ambezarse komo bushkarla.»
Kontado por MARIO SORIANO – 2012
Redaktado por Matilda Koén-Sarano
