eSefarad Noticias del Mundo Sefaradi
Por Rivka Abiry
Purim en el Kortijo
Pasensia es pan i sensia
La fiesta de Purim me akodra syempre lo ke paso antes muncho tyempo en el pasaje Salti onde bivimos en mi chickez. Agora vo lo kontare.
Mi tiyo Maurice bivia kon Esterika su mujer en el mesmo kurtijo kon mosotros.
Maurice era un ombre henoso, alto de boy, era ermoso i orgolyozo. Era shekerdji, teniendo una butika en el bazaar. Se kontentava de su ganansia. No era hovarda o gastador, ma tenia una falta – era muy eskaso, apretava la para, no gastava, no se gozava de merkar kozas karas. A Alegra, su mujer, le dava una chicka semanada, paras solo para merkar kozas de menester primaryo. Nunka le dava regalos.
Esterika ya era kazada muchos anyos kon mi tiyo, ma no tuvo kreaturas. Kon el tyempo se kanso de kesharse por su eskasura. Se lo aresento, No se metia a pelear kon el, ni arebasharse de el demandando mas paras. Era muy hahama. Savia ke de su kamino el no se va shahear.
Una semana antes de Purim vino al kurtijo moestro el pregonero de la keila para anunsyar el Balo de Purim. Ke alegria!!! Todos se metyeron al echo. Kreaturas komo los aedados. Maurice tambien kijo vistirse komo un vezir. Savia de ande emprestarse este vistido, se lo vistyo i se miro en el espejo. Alegre i kontente, yamo a su mujer, ke tambien fue muy impresionada.
“Agora, amostrame el fostan, ke pensas vistirte para el Balo” le dicho a su mujer.
Esterika sin pensar muncho, vido ke vino la buena ora. Presto, presto se vistyo el fostan ke kulaneava kada dia, un fostan viejo ke era aremendado. Los remendos eran kuzidos komo dos aldikeras brodadas. Se metio una prostela i ato kon una kordela sus kaveos ermozos. Una mujer ermoza, paresyendo komo una mosa, kon un vestido ke no le yakishea.
“Kualo es esto”? se marevio Maurice. “Ke es este maymondjuluk???” De este modo keres vinir a mi lado?? Yo el vizir, i tu la mosa???”
“Keridiko, no tengo otro fostan” disho Esterika kon una chapeta en sus karas, i kon lagrimas en sus ojos.
En este momento, Maurice, komo ke se desperto, se averguenso, se topo kulposo i entendio ke nunka no era atentivo por la vistimyenta de su mujer. Le vino al meoyo ke kon su eskasura bozeo la ermozura de su mujer i se arepentio de todo lo ke izo. Pishin entro a su kamareta, kito del lugar eskondido la bolsa de paras i la metyo en la mano de Esterika.
“Alevantate!!!! Te rogo toma estas paras, topa una de las mas grandes kuzenderas ke te apronten un fostan komo la Malka Ester, para ke seas la mas linda del Balo !!!”
Antes de irsen al Balo, se fueron los dos ande el fotografchi i despues mandaron la foto a la ermana a New York. El foto enkadrado se puede ver fina agora sovre el bufetiko.
Editado par Israel Bar Yehuda- Tel Aviv.
