Las konsejas de Rivka: MOBILIYA MUEVA

Por Rivka Abiry

Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.

MOBILIYA MUEVA

Amanesiendo un dia topi la primura de merkar me mobiliya mueva. Apani el telefon i yami a mi ijo al ajeno.

– Ola, ola, ijiko miyo, te esto telefonando pormodo ke me pensi de merkarme un bufetiko muevo. Meti de kote unas kuantos paras i komo arkitekto te esto rogando de darme tu konsejo.

– Buiurum mama, kon plazer i ashkolsun! Alkavo vino el tyempo de trokar la mobilya antika, i de merkarte unas kosas mas modernas. Al kual model pensates?? klassiko, renaissance, barok o moderno?

– Asibiva tus pulgas, decha el model. Kero uno ke mi vizina se patleara de selo. El bufitiko ke sea alto, ke tenga una kolor klara, una vista atirante kon un lugar para los vasos buenos de bever, para la plateria mia, las ridomas de vino, ke ayga ayi una vitrina para mis souvenires presiosos, kashones para los albumes, los manteles, un lugar para el gramafon, i otras kosas ke no se empleyan kada dia.

– Diosanto i alavado, mama, para todo esto todo te prime un armaryo grande no un bufetiko. Los bufetikos oy se azen bachos, de teak, chikos. praktikos i elegantes.

– Bueno, bueno, no me shashereas. Dezenya mi uno, ma no te olvides ke tenga rouelas, para meter lo de un lugar al otro, ke aya delantre un vidro para mirar i ver las kosas de valor, i para no primir abokarme si kero kitar una kozika, una cupa de café, o meter el gramofon a djugar.

– Mama, el gramofon paso su tiempo. Oy ay el DVD, ke se aprovcha para los CD, los filmes KODAK i el JPEG, el MP 3 or 4..

– En ke lingua estas avlando??. Vos ambesaron esto en la eskola ?? De ke kosas me estas avlando? Me estas kitando loka. No kero un bufetiko kon pachas de aluminium, o nirosta –kualo es nirosta? Keres dizir ni rosa ni spina. Ya tengo bastante de fiero en mi pachas después de la operasyion.

– Si miras, mama, no tienes una seria komplida de vasos. De los vasos buenos de kristal te kedaron solo dos, de estos ke merko el papa en Gabrovo/Bulgaria ante 50 anios tienes solo sinko, los vasos altos para la champagne….. no se usan mas. Kualo tienes de tan valorozo ke keres ver detrás los vidros de la vitrina. ¿???

– Djoha ke se vido kon tavan boyali!!!. Ijo mio, no te olvides los suvenires ke arekoji de mis munchos vijajes, ke kada uno i uno te puede kontar una konsejika.

– Hadras i baranas . Ay, mama, no te metes a diskutir. Estas avlando bavajadas. Toma para eshemplo el patiko amarillo de plastik ke merkates en Tibet, o de la maymunika bova ke truchites del Mechiko, del asniko (ke tiene agora solo tres pachas) o la kuchara de “oro” – totalmente ferrojantada ke se atrivieron de venderte en India. No egzajeres.

– Me kitates la gana. Ya me arepenti, ya me hize pishman de la ora ke te avli del bufetito. Saves kualo. Lo vo dar al vizino, el bojadji, ke me mete laka, ke me mete un kat muevo de boya ,ke me lo aga nuevo i kon las paras me vo merkar un espejo para el banyo..

– Aspera, aspera, saves komo son los espejos modernos. No se alkongan a la pared, ma se arrelumbrar de detrás…….kon una luz chika.…….

– No, no!!!!!

– No me enterompes. ¡!!!.

– Avlar la verdad es perder l’amistad. Ijiko miyo te va kostar muncho esta konversation pormodo ke es del ajeno.

– Mama, es tu ke me yamates, es tu telefon.

Ayer salio de la kashkara del guevo i me esta dando konsejo.!

Rivka ABIRY / Haifa