eSefarad Noticias del Mundo Sefaradi
Por Rivka Abiry
Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.
DOS MADRES – UN NOMBRE
Kuando me desperti esta demanyana, mirando por la ventana a la kaye, vide grande banderas de Israel i Fransia enkolgadas de los tavlados altos de las lampas ke esklaresen la kaye, djugando kon el viento. Esto me akodro un akontesimiento ke vos kero kontar.
El pasado anyo fue invitada a vijitar Nice (Fransia) para enkontrarme kon mis primos.
En yegando ayi me sorprendio de deskuvrir ke me toparon un otel «Le Petit Palais» situado serka del Museo Matisse i el Museo Chagall, no leshos del sentro. Era un otel amistozo de famiya, ke en verdad era un lugar muy konveniente para mi. De mi kamareta me plazia ver a partir de la demanyana fina la tadre la vista panoramika de la sivdad, las kolores de la mar trokando del blu profundo a la plata, la vedredura de los arvoles, komo de mesmo en la leshura el aeroporto. Saliendo del otel, viajando kon el karro, se entrava en la sivdad de Nice, despues al paseo maritimo i a todas las sivdades ermozas i famozas de la Kosta. Ayi mos enkontrimos en las kayes i kalejas kon las otras djentes, kon los grupos de personas i turistos ke se arekojian para kaminar, para avlar o kantar kon una gitara. Mozotros de mesmo kaminando a lo largo del paseo maritimo, gozimos de la rika vizion ke mos plazio a todos, ke en verdad es manyifika. Ansina mos gozimos de konoser el Cap de Nice, la famosa Promenade des Anglais, Beaulieu, el Baie de Villefranche sur Mer, Cap Ferrat, Antibes, Juan-les-Pins, Cannes, St Raphael i St. Tropez.
Kuando arivimos en agosto el anyo pasado, fue djusto kuando Nice estava selebrando su 150 aniversario desde ke el Rey de Sardinia dio Nice a la Fransia. Pero lo ke me impresiono sovre esta parte de la Cote d’Azur, eran las guertas, los chikos kaminos ke se topavan afuera de Nice, los lugares alderedor, en la kampanya, tal komo Tourettes sur Loup, St Paul de Vence, Le Gourdon, Grasse i Mougins.
Los restorantes lokales son todos amistozos, te rogan de entrar ariento i ainda te presentan la mijor kombinasion de komidas i de beviendas, ke te pueden ofrir. Saviendo esto, la noche del festival del porto de Nice, mos fuimos a un restorante serka del porto djusto en frente de «La Colline du Chateau». Aki enkomendimos la «bouillabaise» una supa de peshkados kozinado kon diferentes yervas, «la courgette de beignets de fleurs, el «farci» i la «krem karamel». De mesmo tengo de kontarvos ke mos sirvieron despues de todo esto, dos a tres tipos de kezo, ke se sierven jeneralmente a la fin de la komida franseza komo dijestivo. Al igual mi madre lo yamava «la eskova del estomago»
De mesmo gozimos del festival del porto kon un otro grupo de Israelis ke mos akompanyaron al restorante i ke les agrado el saltanat feliz al dorador. Avlavamos ebreo i despues de unas kuantas beviendas izimos bruido, ke yo noti de las miradas ke mos echaron las otras personas kuriozas asentados en el mesmo restorante.
Personalmente gozi de esta atmosfera pero me senti kansada, teniendo en kuento la musika a todo volumen en el fondo, el mucho avlar i la ora de la noche. Sin sintir serri por algun tiempo mis ojos, ma me aparesio ke vide mi ijo alevantandose i en tomando un vidro kone vino, disho kon una boz kayente i dulse ke arepoza la alma:
«Kero dedikar esta tadre a mi mama ke trayi de Israel i ke esto viendo ke la poveretika se kanso, ma ke kero espertarla.
Despues echo una mirada a su espoza i las otras personas, en diziendo:
«Puedo ayudarla… ???».
Las respuestas no lo sorprendieron. El entonses kontinuo:
«Visto ke este es el noventen aniversario de mi mama, yo le apronti amanyana una sorpreza, ke so siguro ke no se asperava, ma ke kreo ke le va azer plazer.»
Ke sorpreza??? demandaron todos ke estuvan asentandos a muestra meza. Pero mi ijo disho solamente:
«Por favor, la sorpreza de la noche deshala para la manyana. «
En este momento, dos personas ke estuvan asentadas al lado de mozotros se alevantaron i se aserkaron de mozotros, demandando si avlavamos ebreo i si venimos de Israel. Los kombidimos a muestra meza i la dama, mos konto la istoria sigiente.
» Aze vente anyos ke su ijo Vitali viajo a Israel i lavoro komo voluntario en un kibbutz. Ayi konosio a Yaaloma, se enamoraron i mesmo el proposo de kasarsen. Pero Yaaloma, siendo la ija de un sovrebiviente de los kampos de muerte de los Nazis, lo refuzo, por modo ke el era katoliko i no djudio. Esta romansa se rompio de manera ke el mansevo amargado de vista se fue atras a la Fransia. Desde entonses no se vieron ni se oyeron uno del otro » .Despues de este triste kuento, los dos invitados, plaziendoles el muabet, se kedaron dainda mucho tiempo a la meza muestra..
El sigente dia me dishe «Si te dan, toma, si te aharvan, fuye.» No tuve muncha pasensia de endevinar la sorpreza. Ma la vieja kere bivir para mas ver i oir. Me yevaron a Monte Carlo donde en el luksuozo restorante «Le Saint Benoit» fue aresentada una chika fiesta. Este restorante tenia vista a la sivdad, a la mar, al porto maraviyozo, i a las hevras de yahtes. No era imajinable mi alegria, mi felisidad de resivir un tal regalo de mi ijo. No podia kreerme ke era todo verdad. Tuve todo el tiempo lagrimas en mis ojos, keria bezar i abrasar de muevo mi kerido, regalado ijo.
Despues de gostar el tipiko anti pasto, el vino, el menu de frutas de mar, i los diferentes kezos, la puerta de la kozina se avrio i el kozinero prinsipal, vestido en su uniforma blanka, trayendo una torta en su mano, i su ayudante una kandela alumbrada, se aserkaron de mi. El maestro kon finesse tomo mi mano i disho:
«So Vitali, del kual ayer vos avlo mi madre, ke les konto sovre mi primer amor i del tiempo ke pasi en Israel. Estimada sinyora, mis felisitasiones, salud, todo bueno, sana i saludoza ke me este i ke goze de su estado aki en Monte Carlo.» Me se tomo el tino i el suluk. No pude dizir ni una palavra. Estuve muy emosionada, yorando, yorando…
Apenas tuve el tiempo de alimpiar mis lagrimas de alegia, Vitali kito de su aldikera un chiko kuti de djoya i me amostro arientro una ermoza brosh de oro, la bandera de la Fransia. Me arogo, a mi retorno a Israel, de mandarlo a Yaaloma.
Despues de unos kuantos dias resivi la sigiente repuesta:
“Grasias de azerme akodrar de Vitali, ke yo me siento kulpoza de romper su korason, antes de munchos anyos. Entremientes me kazi, tengo un marido enkantador i pari dos ijos. Kon el permiso de mi marido, di a mi ijo bohor el nombre «Haim» ke es la traduksion perfekta del nombre de mi amigo fransez «Vitali» o «Vito» komo lo yamamos aki en el kibbutz.”
Este kuento es dedikado a mi kerido ijo
Rivka ABIRY / Haifa
