eSefarad Noticias del Mundo Sefaradi
Por Rivka Abiry
.
LAS DADAS SON TOMADAS
De sinko años atrás, kuando yo vide ke un edifisio se va konstruir en muestro visindado no estuve muy interesada, pero después me fui tiempos i tiempos, otra i otra vez, para vijitar este sitio de konstruksyon, asta ke finalmente me dezisi de merkar un apartamento. Dado ke asta agora mori en el premiero piso, eskoji un apartamento en el ultimo de este edifisio muevo, ke fue moblado a mi gusto i ke agora tenía una mirada en todas las direksyones, a la mar, asi komo a la montaña.
La razón ke keriya un apartamente en el último piso fue porke yo siempre soñiyava a tener una vista desde mi apartamento, de la sivdad, de los techos de las kasas, el puerto, las kayes prinsipales entrando i saliendo de la sivdad, i los lugares vedres dentro de la sivdad. Además devo konfesar ke me plaze viajar kon avion i siempre soñyava sentarme en un helicóptero o un balon de aire i volar alderedor de muestra sivdad.
Una mañana kuando me desperté, vide ke no lejos de muestro edifisio alto, un ekipo de konstruksyon empeso a serar un otra lugar para konstruir ayi un muevo edifisio. Ansi me vino la idea de bushkar personalmente el kontakto kon el konductor de un vinch para kompartir kon él informasyiónes sovre las vistas de la sivdad. Esta oportunidad no tardo a pervenir me, kuando tuve el alamo de azer una búshkada en el Internet ke dengo el deseo de enkontrar un operador de un vinch, ke seria pronto de partajar en una konversasyón konmigo. Kuando topi uno kon el nombre de «Crane 54», yo meti mi nombre komo «Helikóptero» i ansi empeso muestro chat i muestra e-mail. Dado ke en este momento yo tenia una pierna rota, estava echada enkamai obligada a adelantar en el piso kon la ayuda de un bastón, el chat fue la mejora terapia okupasional i malezina ke un médiko podía darme.
De esta manera mi chat inofensivo kon el operador de vinch komenzó, más o menos a título personal, aunke ke él me disho ke el seria kapachi de konversar konmigo sólo a las oras despues del travajo, pormordo ke estava laborando a una grande altura i fue ovligado por razones de sekuridad de konsentarse totalmente a los ordenes ke resivia de abasho. Su úniko kompañero, ke le era permetido en las alturas, era la músika, ke le enkantava eskuchar, en trajende konsi el radio suo. Yo komo amante de músika, en muestros chats, en primer lugar, avlava kon el sovre esta tema. Inkluso a vez me aparesia oyir músika desde muy leshos, músika de baile, musika jazz o músika moderna, pero siempre kreí ke todo esto era mi pura imaginasyón. A verdad desde leshos no pude ver el operadordelvinch, solo pude verlo asuvir se en su kabina, pero nunka tuve un aserkamiento para saver ke persona era. Las konversasyones entre mosotros eran interesantes, i es ansi ke el me informó ke avía tomado este lavoro para ganyar una mesada, siendo era estudiante en la Universidad lokal. Kuando yo empesi a eskrivir mi email ektróniko en Inglés, el konfesió ke su konosiamiento de este lingua era povre, pero ke estava dispuesto a mejorarlo. Ras gile , entonses tuve la idea de enseñarle esta lingua kon muestros chates. El estuvo de akuerdo i yo alegre kontente. Esto fue un plazer para mí. También entendí ke el estava muy ansioso i dispuesto i ansi muestros chates resultaron en una espesia de un tutorial intensivo.
Kada segundo dia, me lo aresentava ansi ke en las demanianas bushkava, arekoshia i aprontava las lesyones i la lista de livros ke el devia meldar. Despues a la tadre meldava sus e-mails, korijava los yeros i le ensignava komo se deve adelantar. Entremientes deskruvi ke tengo enfrente de mi una persona intelijente, ke le kuadrava mucho, ke todo kon kolaylik entrava en su kavesa, i ansi kon el tiempo se enrekesio su vokabulario. El bastante presto supo komo kulanear las palavras muevas ke se ambeso i tambien izo esforzos de eskrivir kuentos kurtos ke tenian un stilo liviano, plaziente, kon mucho umor i eran enteresante de meldarlos fin al kavo. De vez en kuanto me embiyava kon sus e-mail rengrasiamentos. Sus palavras bien eskojidas eran alimento para mi alma, me achileavan, me gustavan i me davan fuersa de sontrayer kon los lisyones. Ansi afilu de leshos el me amostrava mucha kara.
Un día el me anunsió ke topo un fondo editorial por sus istorias, ke en presto su primero livro seria publikado kon el título «Una mirada al sielo». Su editor era me parese su tío en Francia. Esta notisia realmente me emotiono i engrandesio mi kuriosidad a ver pronto su livro en los magazines de livros en muestra sivdad i ansí aprender su nombre. Por otro lado me sentia orgoyosa de mi elevo.
Después de esto un silensio korto en muestros chates, pero yo no perdí la esperanza, desde ke vidi ke el vinch estava todavía en el mismo lugar. El siguiente e-mail ke resivi despues de un mez fue su informasyón ke el avia enkontrado una mansevika, una immigrante de Ingleterra, kon la keya podía konversar libramente en Inglés, ke lo animava a eskrivir, inkluso una novela, i ke a éya el iva proposar kazamiento.
De alguna manera esto me sorprendió, pero no me kedo otro de esperar ke de resivir por posta elektrónika un kombite a la seremonia de la boda. O era todo esto solo un sonyo muyo?????
No, nada de esto. Ayer me kayo en mis manos el livro de Moshe Moreno „Una mirada al sielo“ . En la primera pagina pude meldar:
Mis grasias de todo korazon a „Helikoptero“ ke sin su ayuda tan persistenta, yo no avia ayegar de publikar esto livro.
Rivka Abiry
Publikado en el periodiko «El Amaneser»
