eSefarad Noticias del Mundo Sefaradi
Por Rivka Abiry
Ken me puede disir si observo, en un aeroporto las valijas ke se entregan a los pasajeros despues ke arivaron a su destinasyon. Siempre ay muncha djente deredor de la banda transportadora ke se arodea todo el tiempo, fina ke el bagaje ampesa a salir del tunel. Las valijas i chantas, echos de diversos materiales, vedres, kolorados, mavi o pretos, koryendo, saltan una despues de la otra, o una ariva de la otra kon muncho bruido i a la fin kayen sovre la banda, eskupandoslos a todas. Mosotros siempre los fiksamos kon muestros ojos, para presto rekonoserlos.
Ay valijas ke son intolerantas, brutalas, i bruskas, aharvan una a la otra,
o son sin pasensia, son pletesas, fina ke se arresvalan en frente de su proprietario. Otras valijas, las mas grandes, azen este kamino avagariko, yavash, kon dignita, no se dejan ferir, ma amostran su grandura spektakolosa. Todo esto muy enteresanto, se puede asemijar a una korrida de autos. I los viajadores apenas viendolos, los apanian i se fuyen.
Esto era justo ke me akonteso kuando una vez vine de Israel. Vide de lejos una valija kolorada, bushkando me, la tomi, la meti sovre el karo, me echi en los brazos de mi ijo ke me estava asperando, la apozimos en el bagaj de su araba i partimos. Arrivando a kaza metimos la valija en medio del salon, para avrir i amostrar los regalos ke trusho la nona.
En avriendo la serradura todos mos kedimos kon la boka avierta, kuando vimos ke en la valija avia solo vistimientas de ombre. Toda la vistimiente kaji mueva, las kamisas dainda en su empaketido orijinario, kalzados de lo bueno, lo bueno, ke kostaron muncho, i muchos pantalones. Todo aresentado de una persona muy pintilik.
En la valija no avia un adreso afuera o ariento, mesmo la aldikera chika kon el adreso era arankada. Myentres ampesimos mosotros las bushkadas para telefon, ma
sin reushir i kon el tiempo la sola esperansa era la valija mia ke tiene
todos mis detalyos. ¿Seria en la mano de una persona inteligente ke iva azer esforso de topar me? Buena enklavatina i la media noche se estava aserkandose.
Ke rezil, ke desplazer, ke apreto i ensima de todo amanyana Rosh Hashana i yo esto invitada en la Kommunitad. Me esto desmayando. Ke bishmazal……..
A la maneser, un telefono mos despartio a todos. Un taksi devia venir para arekojer la valija i de trokarla. Fui muy emotionada i me se avrieron los ojos, ma no avia tiempo de eskrivir una letrika de rengrasyamiento, o unas kuantas palavras “te rengrasyo”. Apenas me abasto el tiempo de bever mi kafe i de meter en la valija una karta de felisitar por Rosh Hashana..
Kon la valija me mandaron una sola rosa kolorada, nada mas. Por tanto nunga no enkontri la persona ke ize el trokido. Entanto kada anyo resivo una karta de Rosh Hashana embiyada de diversos payises en el mundo. La rosa la seki i djunto kon las kartas de Rosh Hashana tienen un lugar majsus en uno de mis dolapes.
