eSefarad Noticias del Mundo Sefaradi
KONKURSO DE KOMPOZISION DE LADINO 2025
DATA DE PREZENTASION: Asta el 31 desembre de 2025
Buto del konkurso
Adelantar la lingua ladina i mantener su relevansia en el mundo aktual
Ken puede partisipar?
Todos pueden partisipar! La sola ovligasion es de eskrivir en ladino. Este anyo, va aver tres grupos de partisipasion:
- Prinsipiante: Ay poko ke me esto ambezando la lingua. Lo avlo ama de manera muy limitada.
- Intermedio: Ay unos anyos ke me esto ambezando la lingua, o avlo el espanyol kasteyano.
- Avansado: So avlante nativo, o ay munchos anyos ke me esto ambezando la lingua.
Temas
Las ovras pueden tratar de kualker sujeto, siempre ke sean en ladino. Por agora no tenemos kategorías separadas komo poezias, análisis sientífikas, kuentos para kriaturas, o kuentos.
Los kuentos pueden ser imajinarios o reales.
Kondisiones
- Los kuentos se deven entregar mezo un formulario online ande se puede kopiar i apegar el teksto
- El número máksimo de palavras es 1,000
- Para el djuzgamiento las ovras se prezentarán anonimas. Por esto, rogamos de no eskrivir el nombre del autor en el teksto apegado
La data d’alkavo para entregar las ovras es el 31 desembre de 2025
Procheso de entregar
- Va a muestro formulario online: https://forms.gle/UBsoteF2oLkJLrVe9
- Apega (paste) tu teksto ayi
- Klika“submit”. Te deve salir el mesaje “Munchas grasias por partisipar en el konkurso de kompozision”
Si no ves este mesaje, o tienes algun problema en entregar tu teksto, por favor eskrivemos a americanladinoleague@gmail.com i vamos a tratar de responderte lo mas presto posivle.
La data d’alkavo para entregar: 31 desembre de 2025
Djuzgamiento
Los djuzgadores seran los moderadores de Ladinokomunita. Eyos van a djuzgar en baza del nivel (prinsipiantes o avansados), de los eskritores i van a evaluar en baza de tres kategorias:
- La istorya: La kalidad de la narrativa – si es entendivle, orijinal, kreativo o analitiko, ets.
- La gramatika: Si se eskrive bien i konforme kon las normas gramatikalas de Aki Yerushalayim
- El leksiko: Si el teksto tiene un leksiko riko i variado, de modo ke ayuda a adelantar el konosimiento de la lingua i su rikeza etimolojika
Premios
Los kuentos premiados se publikarán en varias revistas i jurnales indikandosen en letras grandes ke son los “Ganadores del Konkurso”.
Estimamos anunsiar los ganadores en verso la fin del mez de enero 2026 o al empesijo del fevrero, dependiendo del número de ovras ke ay.
