Las konsejas de Rivka: La kama

Por Rivka Abiry

Un dia, en medio de la semana, mi famiya en el ajeno se les enfinko la ideya ke yo devo merkarme una kama mueva. Antes de todo me ize de la sodra. Les di el kamino. Ma ensistieron. Yo ancho hase. Finalmente me izieron la kaveza un davul. La kama!!…..la kama!! Non me estan deshando reposo. Demesmo me metieron “ au fait accompli”. Me azieron bushkar en el “Internet” el adreso de una renomada firma, de topar el magazín ande se venden kamas, me ensenaryion kon una harta komo se puedo topar el magazín- todo areglado, todo djusto, todo muy efikache, todo vale la pena.

Ama en mi kavesa klavo no entra. Anios esto dormiendo en mi kamika, ke esto usada. Noche por noche eya me aresive , me kayente, me desha pasar la noche kon suenos, kon mis ansias, kon mis penseryos. Si kero deskansarme, me echo i me areposo. Es un plazer de entrar entre las savanas limpias i de kontentarme. Ay tyempos ke apreto mi kaveza al kabezal i desho a mis lagrimas kayer sovre el.

No saliendo abacho kon mi famiya, me meti a bushkar el magazín. En entrando ayi, vide los espasios imensos i los modeles diferentes de kamas, en kolores diferentes, para dos personas, para una persona, para bebes, para ayedados. Me se avrieron los ojos. Me shasheri. Ke boluk, ke rikesa.!!! Era difísil de eskojer un model espesial. Komo no avia mushteris, la vendidora me tomo de la mano i pishin me iso , ansina komo era vistida, echarme sovre una kama, para eksplikarme su typo. Naturalmente el mas grande murafet de todos las kamas era el motoriko i su mando a distansia, para alevantar la kavesera, para meter las piernas en alto, i todo esto para dormir mas ferah. Del primero lecho me fuyi a pie deskalso, kuando oyi el presio. Se estan takleando de mi ¿???. La segunda , no me plazio, ke si el motor se rompe en medio de la noche, me vo kedar kon la kaveza enkolgada o las piernas alevantados. La tresera kama era ansina dura piedra ke en alevantandome la demanyana seria sigura kompletamente entavlada. Tambien , entendi ke en eskojendo otros modeles de kamas, los presios ivan pujar fin a los sielos.

La vendidera vido negras i no buenos, no tuvo mas pasiensia kon me, yamo el patron. Esta persona, kon un aksento engles, se asento a mi lado. Emprimero me amostro un livro sovre la fabrika i de los proprietarios. Kontinuo su diskurso kon los aventajes de la kama i duspues avlo de la anatomia del kuerpo umano i de la medula espinal. Las otras temas eran los bebes, las mujeres en los meses dalkavo del embarasso, ansi ke las personas aedades. Esto no hue una boka, esto hue una makina. Yo mirando las yaves ke tenia en su mano, empesi a bushkar una pozisyon mas buena, porke mis oyos se estavan serando i me senti averguensada. En este punto el demando si ronko. Ke persona impertinente…..-“Naturalmente” le dishe. “ Durante mis anios kasadas, mi marido se fuyo de la kamareta de echar, pormodo de mi ronkar. Kuando mis ijos me kombidan a un otel, eskojen para mi una kamareta en el piso lo mas alto, para no oyír el ronkar mio.”- “Si es ansina, Hanum, aboltete, i no vas a ronkar” Bashtune- kon plazer. Ize komo me ordono, i eskuchando su avladero monotono, i la musika de sus yaves ke el estava meneando, topi una pozisyón mas ferah , seri los ojos i poko a poko, sin sentirlo, sin saltanat, me……. endormesi.

Kuando me esperti me alevantaron 6 brasos de la kama, me asentaron en una sija, me dieron a bever un kafe, me miraron kon ojos de amor i me felisitaron.

Me kedi muda……. Me arogaron de venir kada dia, kuando ay mushteris i de demonstrar en “vivo” komo de bueno se durme en estas kamas, sin ronkar. Yo fue por eyos ugurli, i una de la mas buenas reklamas.

Torni en kasa kon los mokos enkolgandos. Ama mi kamika ke no me manke