eSefarad Noticias del Mundo Sefaradi
Por Rivka Abiry
Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.
LA DOMAT
Empesimos muestros aparejos para el viaaje de tres semanas aFlorida. Vino el dalkavo dia. Echi una ultima mirada al doredor del apartamento y dospués, al balkon. Ayi no manki de topar una chika domat en el saksi.
Ke surpriz!!!. Una unika domat en su ermoza kolor kolorada enkolgando i reponzando sovre la planta.
Presto la arrankii la etchi en mi enorme i grande chanta, kon l’intensyon de komerla kayadika i kon plazer en el avion.
Ma las okupasyones durante la salida me izyeron olvidar de este pedasiko maraviyoso. Ansina alkasimos a Miami.
En la sala del aeropuerto, para tomar atrás el bagaj muestro, mos metimos a la kola komo munchos otros viajadores. El bagaj de mano i las chantas vinyeron a muestro lado.
Estavamos kansados, ma kon buenas iluzyones!. Ma kualo ven en supito mis ojos? Un perro, de la rasa Beagle, meneando su kola, i aserkandose de mi entre todos los ke estavan en la kola, para tomar el bagaj.
Se kedo a mi lado, djusto delantre de mi, i yo mirando lo kon ojos de amor. Me muero por los perros. El empeso a meter su mutra en mi chanta ke estava medio avierta. Esto lo topi un poko desgustozo i karaylan, un komporto ke no me plazyo.
En supito aparesyo una persona grande i godra, un kaymakam de la jandarma, i me demando permisyon de kontrolar mi chanta. Me se hue la riza, i perlas de sudor aparesyeron en mi kara.
Me estava muryendo del espanto. Esta persona, ke teniya grandes dedos en guantes blankos, i muncha experiensya, metyo la mano en el karishiklik de la chanta, toko i apanyo la domatika, i después de anunsyarme ke la estava sekuestrando, la metyo sovre el guante blanko de su mano i se hue…
Kualo afito? Ke kelipur syego topo? No avia lugar para demandas.
En este momento vide ke la escriturya sovre la etiketa del perro era:” En servisyio de la agrikultura”.
Entendi ke el perro era empleado para beklear a la agrikultura Amerikana i para prevenir la importasyon de produktos defendidos.
Nunka supe si las frutas de muestra planta de domates le gustaron a los Amerikanos.
Rivka ABIRY / Haifa
