eSefarad Noticias del Mundo Sefaradi
Por Rivka Abiry
Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene okostmbrados.
JULES PASCIN
Jules Mordehai Pincas (31.3.1885- 5.6.1930) konosido komo Jules Pascin o “el Prens de Montparnasse”, era pintador bulgaro.
Jules Pincas nasio en Vidin, Bulgariya de un padre Judio espanyol-sefaradi i una madre Serbo-Italiana. El saviya la lingua perfektamente. Mi padre ke fue asentado a su lado en la eskola Judiya de Vidin, se akodrava ke afilu en su chikes, Jules aziya karikaturas de soldados. El troko las letras de su alkunya, Pincas a Pascin, kon la aprobasyon de su padre, despues ke fue embollvido en un eskandalo kon la proprietaria de un bordel en Paris. El nombre orijinal de Pincas demonstra ke tiene dainda famiya (un primo ke bive en Yerushalayim i puede ser una prima ??? ke so yo)… Ma si tiene dainda siertos parientes bulgaros, no es konosido.
El empeso komo karikaturisto en Alemania i vino a Paris en 1905, parte de la grande emigrasion de la kreatividad artistika al prinsipio del XX sieklo.
Pascin bivio en Amerika en tiempo de la Primera Gerra Mundial i retorno ayi en 1927, en obteniendo la nationalidad amerikana. En Paris, el se konvertio en el simbolo de la komunidad artistika de Montparnasse. Siempre en su chapeyo melon, el era una figura konosida en el Café du D?me, el klub de Le Jockey i otros lugares frekuentados de la sosyedadad bohemia de Paris. En 1923-1924, Pascin retorno a Vidin,Bulgariya. La sivdad Vidin, rekonosiente de su memoria, metio dos estatuas en el sentro de la sivdad (en el Kale – la mahala de los Judios, i delante de su kaza).
Pascin kreo munchas akuarelas, desinos i karikaturas, ke el vendiiya a diversos periodikos i jornales. En resiviendo komandes de sus patrones, el en vezes adoptava i uzava su propio estilo. Pascin estudio el arte de pintura en la akademia Colarossi, komo su kontemporano Henri de Toulouse-Lautrec. La majorita de los desinos de Pascin son modeles ke topo en sus entornos, sus amigos, mujeres o ombres. Los objetos de sus ovras fueron desinados en un estilo tipiko ke fue el suyo. De mismo el keriya ser pintador famozo de su tempo, ma sufriya de profundas depresiones, pormodo ke pensava ke no es kapachi de esto i ke sus esforsos non puedran alkansar este buto. En su opinion, el arte “Klasiko” fue mas bushkada ke el suyo.
Durante los anyos ‘20, Pascin pinto sovre todo “filles fragiles”, las zonas ke asperavan a klientes, o los modelos de las “chikas” ke se asentavan delantre del bordel. Las pinturas se vendian kon kolaylik, ma las ganansyas se gastavan muy presto. Pascin fue de mismo renomado kon sus grandes enkontros i reuniones. Siempre kuando lo kombidavan, el veniya kon tantos bokales de vino ke pudiya yevar. Entre otro, Pascin organizava kon frekuensia, un grupo de amigos, para ir a la kampanya i azer “Piknik” en enverano, al lado del rio Marne. Estos pasatiempos duravan toda la tadre. Segun su biografiya por Georges Charensol, “Apenas entrava Pascin en el D?me o el Select, ke sinko o sesh amigos se asentavan a su lado. Despues en alevantandomos de este lugar, seriyamos 20 en todo, i mas adelante por la tadre, kuando desidavamos de ir a Montmartre, a Charlotte Gardelle o la Princesse Marfa – ande Pascin tomava lugar komo tanyedor de jazz – el deviya tomar 10 taksis.”
En su estoria “A Movable Feast” (Un Bankete Movable), Ernest Hemingway eskrivio en un artikolo, akodrandose de una noche en 1923, kuando Pascin vino al D?me en la kompaniya de dos modeles. El kuento de Hemingway i de ke akontensio akeya noche, se konsidera unos de los imajes ke amostran el Montparnasse de estonses.
Detras de Pascin i su vida bohemika, se eskondiya la terror de una persona torturada i espantoza. Una persona sufriendo de desbafo, i enfluensada del alkool. Yevo una vida egzotika, frekuenteva kon regularidad las kazas de las zonot, de ande muchos de sus kuadros.
En 1923 utilizo kolores pastel i uzo la teknika de la transparensia, ma la majorita de sus modeles son el tema de la mujer nuda, un ambiente en el kual el bivio totalmente.
El estilo de Pascin es de vezes impertinente, konsumado por el alkool i la depresion.
Pascin se suisido en su studio en Montmartre, una noche antes de la inogurasion de su sola egzibision de pinturas. Se korto las venas i desho un mesaje eskrito a la pared en su propia sangre, despartientose de su amor perdida, Elvire “Lucy” Ventura.
En el diya del enterramiento de Pascin, todas las galeriyas en Paris se serraron. Munchos konosidos de la komunidad artistika, djunto kon los servitores de los restorantes i de los salones ke el avya frekuentado, vestidos todos en preto, kaminaron detras de su aron fin el Semeteryo de Saint- Ouen.
Rivka ABIRY / Haifa
Publikado en el periodiko «El Amaneser»
