eSefarad Noticias del Mundo Sefaradi
Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.
INVITASION A UNA BODA
Por Rivka Abiry
Djoya yamandome por teléfono me sorprendió un poko, pormodo ke yo no avía oído avlar de eya por un largo tiempo. Djoya, la bivda de mi primo, bive en Tel Aviv, ke despues de muchos, muchos anyos se enkontro kon un amigo i se kazo de muevo. Ansi yo piedri el kontakto. Muestras relasiones, devido a la distansia, i las muestras diferensias de edad, kaji se rompieron i desparesieron. La únika koza ke me akodro es ke eya tenia dos kreaturas kon mi primo, i ke ganava su vida komo vendedora en un grande supermerkado en Tel Aviv..
Djoya me telefono para anunsyarme la boda de su ijo kon una chika de Australia, de Sydney. Preguntando mi adreso, eya fue muy amistoza, sinsera i insisto ke venga a la fiesta de la boda, ke fue fiksada para el Lag Baomer (34) día del Omer. En akordo kon muestras kostumbres relijiozas, se save ke las restriksiones de kazar se alevantan del 33 a kontar del Omer. Komo rezultado ke, las fiestas de bodas, se empesan despues del medio dia kuando la tadrada arekoje el sol. Los judíos Sefardís fiestan bodas en el 34 día del Omer.Komo la yamada telefónika arivo unos pokos días después de Pesah, yo teniya un montón de tiempo para desidarme si iva asistir a la boda. Kuando avli kon Djoya por teléfono, eya estava tan kontente ke me yamó ke yo kaji aksepti de partajar kon eya i su famiya mueva esta fiesta.
Komo bodas aki en Israel se fiestan en salones de bodas después de la puesta del sol, yo tenía de organizar mi transporte de Haifa a Tel Aviv. En este kavzo, me se avrio el mazal, no devia bushkar muncho, pormo ke de mesmo mi amiga Alegra keriya partir el mismo dia a una boda a Tel Aviv. La invitasión miya era para un salón kompletamente deskonosida para mí, pero kaji en la misma zona de la de Alegra.
Todo lo ke supe sovre la sala de bodas, es ke era un lugar elegante i sofistikado muy renomado, ke yo podía konfiarme en muestro konduktor de taksi ke se komprometió a rekojer Alegra i mi a la ora 7 de la tadre. El iva ayudarmos a alkansar muestro destino después de ver las invitasiónes i el plano del lugar.
Una vez asentadas en el taksi después de kontrolar las invitasiones a la luz de su asiento, el shofer del taksi mos retornó las invitationes, notando el adreso en su tefter de teléfono. Tomando las invitationes de su mano, las metimos en muestra chanta. Desde entonses tomimos muestro kamino disfrutando del sol, del kamino ke korre a lo largo de la kosta de la mar i por último la entrada en Tel Aviv, ke siempre me plaze. Yegando a Tel Aviv ya estava oskuro i el trafiko grande.
Fui yo la primera ke sali del taksi, ke me apozo djusto enfrente de un salón riko, iluminado, elegante i adornada kon mucho hen. Fue tresalida del saltanat ke vide. Entrando en la sala me agradaron i impresionaron las mezas bien arregladas, kon flores i la multitud de invitados.
En primero yo meti mi regalo de boda en el kuti espesial, a la entrada de la sala i miri al alrededor para saludar a la famiya. Todo lo ke vide a la entrada fueron personas muy elegantemento vestidos, pero absolutamente deskonosidos para mí. Komo avlavan ingléz, yo supozi ke eran los parientes de la novia, ke avían yegado de Australia. Les di la mano. Mesklandome kon los otros invitados, tuve el mazal ke una mansevika, no saviendo deke alkansi a este lugar, me izo asentar a una meza, ke malorozamente fue serka de la orkestra. No me plazio pormo ke el bruido emitado por los instrumentos, era muy fuerte. Komo todas las mijores siyas al alderedor ya estavan okupadas, mi eleksion de trokar el lugar fue limitada i komo la boda relijioza ya la izerion en Sydney, mos demandaron de ampesar kon los aperitives i la bevienda.
Siguro ke me alegri ke yo avía yegado i no me meti a bushkar a Djoya. Yo estuve segura de ke eya iva a enkontrarme. Las servidoras vestidas en uniformas elegantes, kaji mos atakaron kon su delisiozas dekorados antrés. A partir de esto, el bufeto era muy riko, la komida suprema, sólo la múzika era demaziado fuerte i devido a mi diskapasidad auditiva i ke la djente a mi alrededor me eran deskonosidos, yo no podia konversar kon dinguno. El rezultado fue ke me dediki a la komida i observar los jóvenes bailando. Después ke servieron delisiozos pasteles i kafé, yo pude felisitar a los rezin kazados, ke no me konosían, i despues komo ya fue tadre i devia retornar a kaza, no pensi del todo de bushkar a Djoya. Desidí solo de kitar la boda, de salir de la sala i de bushkar transporte para yegar a kaza. No tuve problemas para topar un taksi porke el salón de boda era serka de una estasyon de taksi.
La manyana sigiente, kuando yo keriya kompartir mis impresiones de la boda, Alegra me yamó por teléfono. Kuando le dishe lo ke pasó, eya respondió kon una fuerte riza histérika i kuando le demandi kualo akontesio, eya me disho ke el konduktor del taksi konfundido del intenso trafiko, se yero i mesklo los adresos de los salones. A mosotras las dos, el mos amostro la entrada yerrada del salon de boda.
Una tala konfuzion ke me afite a mi…, ke “tupé”, ke estupidez, ke frakaso, ke kepazelik !!! Me se suvio la sangre a la kavesa, i senti una yelor en mi espalda. Guay de mi – ya me kemi! Vos dire la verdad, me averguensi, malgrado ke dainda tenia la savor en la boka de este dia, de esta ermoza boda. Ke lokura !!! Ke frakaso. Ma supe – negra la kulpa, mas negra la deskulpa.
De todo ke akontensio salio un tersene kon un guesmo desagradable. La unika koza ke mos konsolo era ke mosotras las dos aregalimos chekos eskritos por la misma kantidad de paras.
Enviado por Rivka ABIRY / Haifa
