eSefarad Noticias del Mundo Sefaradi
Escrito de una mujer de 90 años
Komo estas? Kualo estas aziendo después de pasar los 90 anos. Vos kero dar un resume chicko.
Yo esto meldando mas, eskriviendo mas, i mas poko okupando me kon la limpieza de la kasa i de gizar. Esto mas predisposada de asentar me al la taraza de mi kaza i de mirar afuera, a los árboles, a la nuves, a la djente ke pasan, a las kriaturas ke djugan. Me es una alegria de asentar me en frente del ordinateur eskrivir e-mails, o djugar bridge kon personas imaginarios, deskonosidas i elektrónikas. Kuando el tiempo lo permete, salo de kasa mismo si es solo para merkar un timbro de la posta. Yo esto pasando más tiempo vijitar konosidos en las mañana, enkontrarme kon amigas en un kafé, i mucho más reposar me.
Yo no esto mas pensando a usar o kulanear kosas para los otros días. Esto usando mi mas bueno service de mesa i las kupas mas ermosas de bever i non emplear los solo por un evento ekstraordinaryo . Ama todo kon tabiet. No esto mas esperando ke tenga paras para merkar el programo nuevo i moderno por el ordinateur mío, de ir me al sinema, al teatro, o viajar mí familia al ajeno (solo ke me invitan). Todo lo deshado es perdido.
Bushko okasiones de kombidar amigos en un restaurante i pagarlos la konsumasión, en lugar de asperar ke me invitan eyos. Bushko okasiones de dar regalos a mis enietos en lugar de asperar un teléfono de eyos. Bushko de avlar mas ke prime, para
tapar mi tristeza interiora, la infelizitat, i no afendentar la djente kon mi dolores chikas. Ma no te ases resil.
Si vienen musafires, los invito a komer en la sala granda, sin mucho tekilif, meto mantel ermoso sovre la mesa, i non los kombido en la kosina. Si ago mis empleos en el “Super” bushko komidas ke saborear la boka, komo “lakerda” “salamon”, “liches”, “kaviar o tarama kolorada,”sushi”, ”kastañas, langosta, shrimps, kezo de la Suisse o de la Fransia, vinos karos i karne freska, o siertas kosas delisiozas de komer. En demas la teoría deve ser, si tienes paras, toma te un taxi después ke empleyates por 100 Shekel , no asperas al autobús, enkargada kon paketikos i bolsas. A mosotros anios no va la pena de serar la sentura.
Yo no uso perfumes, ma kero konsejar a las personas ke aman perfumes, de usar los en lavorando en el ofisio, en la banka, o en una botika.
Si te gusta invitar unos kuantos amigos i pasar el tiempo, deke no llamar par teléfono otros, ke perditas de vista, i ansina estableser de muevo las relasiones.
Se dise ke amigos siempre son a tu lado, ma amigos verdaderos no prime dar te la mano, por modo eyos son siempre a tu derecha.
Si te plazen siertos amigos, entra sus kases kon un sonriso, i traje los una bavashada chika mismo ke sea solo una flor o un pedaso de torta, un tajiko de almendra o una lektura ke meldates i ke te iso plazer.
Kero rekordar me de los nombres de personas, ma me es difícil, deseo viajar a New Zealand i Australia, ma no puedo, kero vestir me kon jeans i chapeos grandes, ma no me van, kero ambesar muevos kosas, ma no me entran en la kaveza, kero debaraserme de kosas ke rekoji para ke se tope, ma no lo puedo, kero asuvir me muchos eskaleras ma no tengo la fuerza, me se toma el soluk, kero tantos kosas…..ma no lo puedo. “Otra ves”, o “otro dia” piederon su valor en mi vokabulayiro. Si vale la pena de aser lo ágora, si tienes gana de aser lo, no lo deshes para amaniana.
Kada dia kuando avro mis ojos, me digo, ke es un dia espesial. Kada dia, kada punto, kada respirasión es un regalo. Kuanto pasates los 85, ya ambesates bastante, ma kale solo akodrarte de eyos.
Yo no me kreo en maravias, yo los sostengo.
Si es posible, la vida deve ser un desino de savorear las ekperyensas, no de soportar las. Yo kero rekonoser estos momentos i abrigar los.
La vida non es solo el plazer, ke esperámos, ma kuando esta aki, gosa la i apresia la. Tu vida no la puedes prolongar, engrandeser, o aser mas profunda. Goze kada momento, ke la vida no se puede tornar atrás, no se puede entender solo en mirando atrás, ma kale bivar delantre.
Rivka Abiry
Rivka Abiry partaja kon mozos sus konsejas, Estos kuetizikos son kontados por Rivka kon la grasia ke ya mos tiene akostumbrados.
Fuente: Enviado por Rivka ABIRY / Haifa
