eSefarad Noticias del Mundo Sefaradi
Por Rivka Abiry
EL TOSTADOR
Munchas vezes pensi a trokar el viejo tostador ke me dio mi abuela, ma no tuve korazón. Yo lo usi 10 anios i agora vino la buena ora. Esto asentada en el mupak, mirando el paketo grande kon el muevo tostador. Lo avri. No tiene kolor. Es transparente, ma tiene munchos botones i su mas grande avantaje es ke es konsiderado komo un utensilio de mupak audio-visual. Puede avlar. En komparesyión kon la antika ke resivi de mi abuela, es muy espektakular. El livresiko de instruksyones kontiene unas 100 páginas. Demás ay kuatro CDs i un DVD (debaldes). Se editado también en braille.
El tostador tiene una sistema komo en el navigador, ke te dize ké azer en avlandote. Primero te saluda kon «Bienvenido», i luego te dise ke la ayuda está diseñada para ambesarte la mekanika del tostador durante su uso.También puede ayudarte a suportar doloros i azerte aflakar. Esta maravija kontiene sinko sektiones: la edad tua, la altura tua, komo tomar deskansas, ir mas avagar, komportar te kon tu marido i estar sana.
El siguinte paso es de apretar el botón «Inisio» i resivir el «Menú». Bastante klaro i fasil.!!!!! Luego te se da la posibilitad, si es nesesario, para trokar otomátikamente este utensilio de mupak kon el «Micro».
Simple, kero disir. Agora viene el torno del kontrol remoto. Se eskrive ayi kon una pluma (komo en un GPS), lo ke la persona desea komo su produkto final: pan tostado normal, el número de los tostades, (a diferentes temperaturas), tostadas kon keso o marmelada, tostadas fransesas, beigale kon sésamo, o panes de mas chikas granduras, Si metes panes ke tienen un diametro de 4 cm, el tostador te los puede kitar kon una grandura de 2 cm.????. El tostador puede achetar de azer de chikas revanadas mas grandes. Las migas se alimpyan otomatikamente.
Eskoji toast normal. En el momento ke la persona esta desidida lo ke kere del tostador, ke tiene arientro una boz ke avla ( la boz de una mujer o de un ombre),te eksplika lo ke deve de azerse.. Por ejemplo: «Mete dos revanadas de pan», luego «kontinuar», «abolta las a la derecha”, “agora abolta las a la siedra”, “mete sovre el pan la manteka», «mete el keso», etc. Si deseas a ignorar todas estas instruktyones, la boz te dise «Ase klik al “avansar” o no “akseptar”. Ansí se avanza o se serrra, siguinte, siguinte, a poko, a poko … ….Entremientes se ve a través del kristal de la ventana el produkto ke se esta aprontando. Al kavol, la boz dise ke «En unos kuantos puntos tu tostada estará pronta» i te desea «Bon apetito”.
No es tan komplikado komo lo pensi, ma por favor, no te entremetes kontra la boz, ke te puede anunsar “yero, yero” o kedar se mudo. Disfrutando ansina ,para la primera vez, mi pan tostado, bevi mi kafe, ke sin embargo se avía yelado un poko, i luego me echi en la kaye, para ir me al lavoro.
Al día siguinte aprovi el otro menú. Tostadas a la fransesa. El menú i la boz maskulina me disho ke azer. Devo atorgar ke la boz me esta plasiendo, me esta enkantando. Me dezidí por un solo pedaso de pan tostado i desde el pan ke topi en el frijider no estava kortado, me olvidé de entrar el dígito 1 – kero disir- solo una revanada . Imediatamente la boz empezó a ordonarme. “El ordeno no es valido, dame el número de pedasos» i adjusto “mas presto mi temperatura está ogmentando”. Tenia razon. Puesto ke la temperatura estava suviendo, mi pan tostado se izo preto karvon, ke no me gusta i no es sano. Bushki el botón de trokar esta situasión, la boz dijo «volver al paso de antes” Ké maravilla, un kuchillo invisible kito la krosta preta de ariva del pan i la revanada se izo komo normal, komo eya. La boz kontinuo “Mas presto”. OK. OK. Komo estuve en adjele, ize klik i.vide komo una mano de robot salio del tostador, batio un guevo, tomo el pan i lo mesklo kon el guevo. La boz disho: “En unos kuantos puntos tu tostada estará pronta. Aze klik para «terminar» i «Bon Appetito» ¡!!!. Amati la luz, tomi la kopa del kafé, ke estava kompletamente yelada, i me apresuri de ir me al lavoro.
Al día siguinte ke era mi vakansia, tuve tiempo para esperimentar mas profundamente el tostador. Esta vez eskoji el «toast musikal«, una espesia de músika ke akompaña el proseso de tostar komo «Nutcracker Suite», “Marcha Turka «o» Claire de Lune «. Demasiado klásiko me pensi, pero kontinui. Demesmo en la ventanika de kristal aparesieron mis panes en un baile elegante (komo en “Nutcracker Suite”), despues marchando komo soldados (sigun “La Marcha Turka”) i a la fin echando se a durmir kuando la melodía trankila de Clare de Lune estava djugando. Un divertiamento agradable i grasioso, ¿No es ????: Todo esto akompañado por la ermosa boz del narrador ke me emborajo, en ken me enamori. Gozando me de los bailes de mis panesikos, me topi sin kerer, apretando mi dedo sovre el kontrol remote, i según el tono de la musika aziendo klick en «avansar” “ avansar”. “avansar”.
El fumo en el mupak me izo alevantar la kaveza. Los panisikos se kemaron, el signal de la luz se amato, la sirena del fuego ampeso a penetrar el aire, i pudia oírse por todas partes de muestra fragua. Además, kuando la alarma de fuego se aktivo en mi apartamento, los arosiadores de agua ampesaron a echar agua a las paredes i mi vesina estava sonando a la puerta asperando ke le de konte ke akontensio.
Ké disgrasia .!!!!!
Tengo tres posibilitades de resolver esta problema. Si no esto satisfecha, puedo retornar el tostador en 14 días, segundo, puedo registrarme ande la firma ke merki el tostador i de trokar el password o invitar a un amigo de kontaktar mi tostador i demandar su asistensia de lechos. ¿Ké devo azer?
Para kualo me prime todo esto????? Prefero de usar mientres el tostador de moda mucho mas simple ke servio de manera amistosa asta el año 2010 a mi abuela, i ke resivi de eya komo su unika erensia.
