Las konsejas de Rivka: El reloj del abuelo

Por Rivka Abiry

Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.

El reloj del abuelo

Uno de los plaseres, puede ser pormodo ke me kedi bivir lejos de la sivdad, fueron las vijitas de mi nieto. Rafael fue embiado por sus padres kon muncha frekensia, se kedava konmigo durante sus vakansias i disfrutava del aire puro, de la guerta kultivada, kon sus diversos arvoles de rosas, del kumes kon sus gainas, Le gustava asuvirse a los arvoles ke estavan detras de la kasa i luego komer las frutas. Komo un niño chiko, Rafael en veniendo a vijitarme, siempre trayia un chiko sesto kon él, ke en retornando inchiva kon flores, frutas o sheshites de bavajadas. Yo estava felis de tenerlo serka de mi. Se puedia verlo por todos las partes de la kasa, korriendo i saltando todo el tiempo, komo un pasharo. Kuando lo topava, lo abrasava, lo besava i me kontentava. Me azia felis kuando se asentave a la meza, tenia gana i kompartiamos kon gusto la komida ke le aprontava, una de la kosas ke fue mi grande rekompensa. El de mismo me amostrava kara, i me akodro ke kuando una noche avia arelampagos, el vino en mi kamarata para echar se kon mi. No kero ennegar ke de vezes fui kaprichoso, ma simpre tenia bueltas. El era kapachi de djugarse kon oras kon los alates de su papu i ansina de englenearse soliko. No kalia kudiarlo i no me asia angaria. Devia solo echar una ojada. De todos modos era una kreatura enkantadora, trankila i poko a poko, kuando los anios pasaron, de una vijita a la otra, lo vide engrandeserse. Komo nino le kontava kuentos i kuando el se transtorno a mi mejor kompañero, empeso a amostrar me komo se empleya el komputator i komo se solvan las problemas.

Esto seguro de ke también el disfrutó de su vijitas. Me mirava espajar la kasa i kuando yegó a la edad de estar en la eskola me ayudava, me trayiva guevos del kumes, arekoshava las avianas, los pepinos freskos, o las frangulas. Devesez se metia kon mi apegar las etiketas sovre los burkanes de dulses, o aregadurar a las rozas. También kon el tiempo topo algunos amigos en el visindado i kuando él era un poko mas grande, le permiti de fraguar una tenta de indianos para echar se ayi kon sus amigos. Esto era una lokura, ma para el una atraksyon ke no se olvido fina oy. Kon el tiempo Raphael se merko bisikleta para venir a vijitarme, kuando tenía tiempo i yo me akostumbré a su vijitas esporádikas o asperava ke me yama al teléfono.

En todos estos años me di kuento ke el englenje deskojido de Raphael era el reloj del abuelo, ke era en la salla. Le gustava asentarse enfrente del reloj i observar komo el pendulo briyava i se meneyava. Kreo ke él tanto amava este reloyio, ke savia kada una i todas las partes de esta ora, komo funksyonavan, o kuando i komo sonavan las melodias, Iva i iva, siempre dolasheava el relojo. De vesez lo apaniava eskonder kosikas en un kanton, komo pedresikas o plumas, ma yo no le rompia este hatir. Lo deshava djugarse.

Kuando Rafael se fue morar en una otra sivdad i yo me envieji kalia vender la kasa kon todo su mobiliario, i merkar un apartamento en un vizindado diferente. Por supuesto, komo dishe, me arepentí pero debido de aserlo, ma a mi avanzada edad fue obligada de aser este paso, aunke ke mi korazón yorava kuando vendi la kaza.

Un día me se aserkó un primo mío, ke viajava por el país i kería ke le de el adreso de mi vieja kasa. Para desirte la verdad me alegré porke kería saver ken morava ayi, kómo la trokaran la kasa i lo ke él me podía kontar me sovre su vijita ayi. A su regreso me alegré de eskuchar su haberes i sovre todo era feliz kuando mi primo me trusho un kuti chiko ke le fue entregado de los mueves proprietarios, ke lo guadraron para darlo a mi.
Kuando tomi el kuti en la mano, vide una chika etiketa «Para mi kerida abuela», la eskritura de mi Raphael. Avrí el kuti , pero el estava vasío … ….
Kuando yami por teléfono a Rafael, me disho:
“ De ke kuti estas avlando??”
“Kerido ijo, del kuti ke toparon en un kyoshe arientro de la ora”. Esta vasio, kualo avia ariente???
“ Kerida abuela, agora se de ke estas avlando. Ma deke estas diziendo ke el kuti era vasio???. El kuti ke yo eskondi. en la ora del abuelo, esta yeno i debordando de besos, ke yo te mandava . Kerida, abuela estos besos eran i fina agora son las grasias miyas por todo ke asites para mi..

Rivka ABIRY / Haifa