eSefarad Noticias del Mundo Sefaradi
Por Rivka Aviry
Estuve asperando por mi vuelo en el muevo Terminal de Tel Aviv. Saviendo ke el viaje va sontrayer muncho tiempo, me merki un livro, para pasar el tiempo i de mismo merki un paketo de biskuchikos. Despues me asenti ferah, ferah sovre la siya para meldar i asperar.
Sirkanu de la siya ande estavan los biskochikos, se asento un ombre, avrio el journal i empeso a meldar. Kuando yo tomi el primero biskuchiko, el ombre a mi lado, demesmo tomo uno. Yo me aravie un poko, no avli nada, ma me pensi: -Ke komporto!!! En otro kavso, ya le avia dizir mi opinion.
Kuando yo tomi un otro biskuchiko, el ombre tambien tomo uno. Esto me bozeo la gana, ma no keria meter me a pelearme kon un fulano. Kuando kedo solo un biskuchiko, me pensi: -Kualo va azer agora ??
Alora el ombre tomo el biskuchiko lo rompyo en dos partes i me dio la otra parte.
Esto ya fue “hutzpa”. Yo estuve muy furyosa, me alevanti en tomando mi livro i mi chanta , me alonchi del ombre i en corriendo ayegi al “Portal 38” para tomar el avion.
Kuado ya me topi en el avion, avri mi chanta, para bushkar mis papeles, i subito deskuvri ke todo el tiempo los biskochikos ke merki se topavan en mi chanta.
Me repenti de lo ke azi, ma fue muy tadre de topar el ombre i de deskulparme.
De esto paso un mes, kuando me meti a viajar atras a kasa, de Australia a Israel.
Avia lugares non okupados en el avion, i despues de unas kuantas oras , komo es uso en largos vijajes, mos trucheron journales i komida . I esta vez tuve un livro i tambien pensi a arevatar un chiko shuenieziko. Me esperti de un “Hallo” ke me disho un ombre, en un aksento ingles.
Komo el lugar a lado de mi no era okupado yo entendi ke esta avlando kon mi. En avlando ingles me demando si no mos enkontrimos antes en el aeroporto de Tel Aviv.
Subito me akodri del ombre de los biskochikos i komo de feo me komporti entonses. Sentiendo dainda rigreto i komo una persona bien edukada i polida, kuando me demando permisyon de asenterse a mi lado, yo aksepti.
La konversasion ampeso de aki i de ayi, asta ke me konto ke es su segundo vijaje a Israel, ke nasio i bive en Australia, ke sus parientes vinieron ayidespues de la Segunda Gerra Mondial. Ansi me ambesi ke es djudio i ke sus djenitores bivian en Varna/Bulgaria.
Komo i mis djenitores vinieron de Varna a Israel, despues de la Segunda Gerra Mondial, topimos muchos semejantes sujetos i empesimos a akodrarmos de esto i del otro, ke muestros djenitores mos kontavan. Avlimos kon oras. Avia tando de serkano en muestros ermosos rekuerdos, entre otro i de la kusina sefaradi, de los “guevos enhaminados”, del “pasteliko de karne”, i del ‘sharope blanko”.
Me konto ke maravioso payis es Israel, i ke el komo eskrivano pensa de eskrivir un livro en kommemorasyion de sus djenitores.
A la fin tambien kito un foto de su papeles i me lo amostro. De kuriosita me meti a ver la foto. Era de 1939 de la kommunida de “Maccabi” de Varna, la misma ke mi mama tuvo en su album. Vidi un mansevo muy plasiente, kon ojos pretos, kara redonda, i kaveos pretos. Ke surprisa, ke plazer!!, Esto era el padre de la persona ke yo estave justo agora konversando, atras de mi mama.
Un evento subito, afita imprevisto. Es komo un relampago de un sielo triste ke ilumina subitamente tus dias. El tiempo passado de vezes se puede apanyar.
[print_link]
