eSefarad Noticias del Mundo Sefaradi
Por Rivka Abiry
AFIKOMAN
En avlando de Pesaj i del “Seder” ke signifika para mi una reunion de toda muestra familia, me estan viniendo en tino rekuerdos ke kero partajar kon vosotros.
Semanas, dias i oras antes de Pesaj, el alimpiar de la kaza era lo mas importante. Se alevantava la kasa de ariva abasho, se penava i lazdrava i alkavo se bushkava el “Hametz”. Despues ke las balabustas se kitavan la alma kon estos echos, despues ke la kaza estava perfektamenta pronta, ande mosotros se aresentava la grande sala para el Seder. Se akolgavan los perdes lavados, enkolados i utiliados, se chafteavan los tapetes, la meza grande se avria, se metia sovre eya un mantel de Damasko. La meza se arensentava kon platos espesiales i kon kucharas, kuchiyos i pirones de plata, todos engravados kon el monograma de mi abuela “BS”, se arensentavan las siyas, i se pensava ken de los serkanos se devia kombidar.
El lugar sentral de la meza fue okupado por mi abuelo. El tenia una barva blanka i era la persona prinsipal, ke kon sus miradas i movimientos de ojos dava a entender a mis tiyos en su alrededor kualo devia meldarse, i komo kantar. Era komo un maestro dirijando la seremonia, i es el ke dava el siman ken devia salir de la kamareta i retornar kon un baston i trayendo sobre su spalda el afikoman kovierto de una tovaja. Mosotros los ninyos entonses demandavamos“de ande estas viniendo???” i el entonses empesava a kontar la istoria del egzodo del Ayifto.
Alado de el siempre lo asentavan a mi tiyo Josef, el mas avlador de los ermanos, i el mas kapache. Kuando meldava la Hagadah, todos lo eskuchavan i kuando kantava enkantava a todos kon su dulze boz.
Del otro kavo lo metian a mi papa, kayadiko, kayadiko, komo siempre muy modesto, mirando a todos kon una sonriza en su kara, alegre i kontente de la presensia de su mujer i su familia.
Demesmo me akodoro del tiyo Benjamin, ke era una persona kon mucho hen. Savia komo akurtar el meldar de la Hagadah, ma todos konosian sus flakesas pormodo ke tuvo muntcha azlaha kon las mujeres.
Avlando de mujeres, dainda veyo mi abuela, asentada en una grande siya, komo una reina, komo una dama par ekselensia. Mi abuela adorable, karinyosa i engrasyada. Eya usava de vestirse kon fostanes largos, kon una yaka i manchetas de dantela. krochetadas de su mano. Su garganta estava enserada de una kortela preta, para eskonder las rugas i no mankavan las eskularichas, ke los yamava briyantes. Alado de eya mi mama, vestida kon su fostan ke merko en el ajeno, ke era un egzemplo spektakoloso uniko i moderno . Mi mama tenia en kada dedo un marafet. Era la reina del mupak. Todos se chupavan los dedos de sus komidas.
Demesmo no kale olvidar a la tiya Dora. Aunke bien en los anyos ochenta, eya kontinuava a vistirse komo Rita Hayward, ma savia aresentar a toda la familia, savia bivir i dar a bivir. A mosotros los chikos mos azia baylar komo lonsikos del sirko.
Asentado a mi lado era Baruj, el uniko ke no apartenia a muestra familia. Baruj era un guerfano, ke mi papa ke tenia piedad de el, lo protejava. Demesmo lo kombidava en kaza para komer enjuntos kon mosotros. Baruj era mas grande de mi, ma muy seheludo i haham. Mos ayudava kon los lesyones i yo le amostrava komo tokar el pyano. Siempre antes de bushkar el afikoman, el mos konsejava komo estar enjuntos komo un ekipo, para topar el afikoman i komo antes de toparlo, aser tratos para la kompensazion.
Rekuerdo el plato de Seder kuvierto kon una servilleta brodada ke se pasava sovre las kavesas de las djentes, mientres ke se anunsava a kada uno de los partisipandos ke el saliyo del Ayifto i esta libre agora.
Ma mosotros los ninyos esperavamos impasientemente a la komida. A mi la golor de las komidas ke venian del mupak me azian ambierta. Ansi me rekuerdo de los guevos enhaminados, ke se buyivan kon oras kon seboja en una oya, la supa savrosa de gayina, el peshkado kon agristada, las prasikas, el frito del meojo, la mina de espinaka, el poyo kon pilaf i bizelias i al kavo la torta de muez. No vos olvidesh el sharapo blanko.
El Seder se puede solamente terminar, despues de komer el afikoman, puesto el afikoman signifika el “Dessert”.en Aramic. Eramos los mas emosionados sovre esta parte del Seder, i yo penso ke el afikoman era la unika rason de la entera seremonya de mantenermos los chickos despiertos i interesados enmyentres del meldar.
Un anyo embiaron a mi tio para eskonder el afikoman. Baruj se ekskuso atrasmano de la meza para espionarlo i irse atras de el. Kuando el tiempo yego para buskar el afikoman, Baruj en su kaminada trankila, se asento sovre el taburetiko del piano, i empeso a kantar “En su biensa i entendensia “…. o i “vino mi padre i…..” ……ke kantavamos djeneralmente en hebreo i en ladino. Kuando mosotros los chikos estavamos bushkando en kada kashon, debajo de kada manta, en todos los kantones, Baruj estava taniando el pyano. Kuando el finalmente se alevanto, alkanso dramatikamiente debajo del tabuletiko ante estava asentado, amostrando el afikoman. No estuvimos kontentes, demandimos de azer de muevo una bushkada. No me rekuerdo kualo akontesio, ma se ke no era yo, ke topi el afikoman, pormodo ke me patladi de riir i no partisipi en la buskada.
Pasa punto, paso mundo. Las ermosas impresiones de esta fiesta las tengo dainda, no me desharon, pormodo ke las noches del Seder eran una ekperiensia muy esmovante. Toda vida me rekuerdo del lavar las manos, el karpas, el romper de la matza del medio, kovrir i destapar las matzot, teniendo un vaso de vino i kantando “VeHiSheAmdah” i el afikoman. Ma agora troki lugar, esto asentada en la meza komo una persona aedada, so la abuela.
Tuvi el mazal de enkontrar a una semejanta fiesta a Baruj. Komo mi, el entro en anyos, ma dainda es el mesmo haham. Lo yamavan “Professor”, pormodo ke fue uno de los mas renomados doktores de kreaturas en un grande ospital. Me aserki de el i le demande si se akodra del Seder ke pasimos en mi kasa, antes de munchos anyos, i komo se termino kon la bushkada mueva del afikoman. Me konto ke es los chikos ke eskondieron esta vez el afikoman, i los parientes ke devian bushkarlo. Kuando los parientes lo toparon, el presio anunsiado por todos, era ke kerian pasar una vakansia en Eilat o en la Turkia, lejos de kaza, para reposarse, para desbafarse i esto sin las kreaturas.
Vos ize akodrar de estos diyas. Esto es. Pesach alegre!!!.
