eSefarad Noticias del Mundo Sefaradi
Ya savesh ke la Tartuga yeva su kaza en la espalda.
No importa kuanto esforso aze, no puede deshar su kaza. Dizen ke fue un kastigo de Jupiter, porke era una kazera tan haragana ke dechido de no ir a la boda de Jupiter, mizmo ke resivyo una invitasyon espesyala.
Despues de munchos anyos, la Tartuga empeso a dezear aver ido a akeya boda. Kuando vido ke los pasharos estavan bolando kon tanta alegria, i ke la Lievre i la Ardiya Rayada i todos los otros animales estavan koryendo serka, kon tanta ajilidad, kon munchas ganas de ver syempre todo lo ke se pudiya ver, la Tartuga se sintyo muy triste i deskontente. Eya keriya ver el mundo tambyen, ama se topava kon una kaza en la espalda i kon pachas chikas i kurtas ke apenas lo arrastavan de un lugar a otro.
Un dia enkontro un par de Palazas i les konto todo su sufrimyento.
“Puedemos ayudarte a ver el mundo”, disheron las Palazas. “Apanyate a este palo kon tus dyentes i te yevaremos muy alto en el syelo ande puedes ver toda la kampanya. Ama kayate, u te vas arrepentir.
La Tartuga estava en efekto muy agradesyente.
Apanyo el palo kon fuersa entre sus dyentes, las dos Palazas tomaron una punta del palo kada una, i bolaron leshos en alto verso las nuves.
En akel momento un Kuervo bolo serka de eyas. Se kedo muy enkantado de ver esta koza estranya i grito: “Esta deve de ser seguramente la Reyna de las Tartugas”
“Por siguro”, empeso a dizir la Tartuga.
Ama en el momento en ke avryo la boka para dizir estos byervos bovos, eya peryo su kontrol del palo, i se kayo abasho en la tyerra, ande se despedaso sovre un penyasko.
La kuryozidad bova i la vanidad, munchas vezes yevan a la dezgrasya.
Trezladado por
Roger Brewer, Portland Oregon US
Renée Martin, Cardiff, Wales, UK
Fuente: Ladinokomunita
