eSefarad Noticias del Mundo Sefaradi
Un ombre ke bivía munchos anyos antes, kreía ke él era kapache de endivinar el avenir en meldando las estreyas. Se yamava de sí para sí un Astrologo (Endevino), i pasava todas sus noches mirando los sielos.
Una noche, estava kaminando en un kamino al bodre de un kazal. Él estava tan embevesido en las estreyas, i se konvensió ke en eyas podía ver la fin del mundo aserkar, i akel punto se kayó en un burako yeno de lodo i agua.
Ayí se alevantó en pies, enchulado de lodo asta las yakás, i komo loko arraskando las paredes del burako penando de suvirse.
Sus gritos de desesperansa pishín atiraron a los moradores del kazal, ke vinieron korriendo. Lo kitaron del lodo, i uno de eyos le disho:
“Keres meldar el avenir en las estreyas, ama no echas tino ande estás pizando!” Espero ke agora entiendas de echar más tino a lo ke tienes por delantre de los ojos, i no pensar tanto en kozas abstraktas komo el avenir leshano.”
Disho otro del grupo: “Para ké te sirve meldar las estreyas, kuando no puedes ver lo ke ay akí en la tierra?”
Ten kargo de las kozas chikas, i las kozas grandes se resolvarán de sí para sí. / El gameo no mira su korkova
Roz de St. Louis, Michael de NY i Aaron de DC
Fuente: Ladinokomunita
