LA VOLONTA DE AZER PAZ KON ISRAEL por el Dr. Selim Salti (teksto i audio)

selim salti 01

45 anyos antes Anwar El Sadat mostro al mundo arabo el kamino komo azer paz kon Israel i el mundo djudyo. Esta persona vizionara, mal achetada por la mayoriya de los dirijentes arabos de akea epoka, supo kon koraje vinir a Yerushalayim i dizir a Israel : si achetash a dar atrás las tyerras ke okupatesh en 1967 i si permetesh a la kreasyon de un estado palestiniano kon Yerushalayim arabo komo su kapital esto pronto azer la paz kon vozotros i a rekonoser de yure el estado israeliano. Acheto sin ekivoko ke Israel es la patriya de la uma djudiya. Ansi kreyo la famoza teorioya politika “tyerra kontra paz”.

Kuando el 19 Novembre 1977 vino a negosyar kon Menachem Begin, apenas primer ministro de Israel despues de ser munchos anyos el shef de la opozisyon en la Kenesset, el mundo entero kedo sin reflo de ver los 2 inimigos de ayer tomarsen la mano i avlar de paz para el Medyo Oriente, koza ke trokava el jugo politiko en esta djografiya tanto rebolteada despues de la fundasyon del estado djudyo. Shimon Peres avia deklarado a la prensa ke le preguntava su sentimiento sovre la vijita del prezidente Sadat, disho“estamos en frente de un muevo Medyo Oriente”.

Los 2 dirijentes ke no estavan del todo kontentes de esta vijita eran Arafat el palestiniano i Assad el siryano. Ademas el muevo eskojido prezidente amerikano Jimmy Carter no era kontente visto ke el enkontro direkt de los 2 adversaryos lo empidyo de realizar su projeto de organizar una konferensya internasyonal en Djenevra, Suissa sovre el Medyo Oriente onde se devia tratar el konflikto Israelo/palestiniano en prezesya de todos los payizes arabos, de Israel, del Olp, de los Estados Unidos, de la Rusia i de la Unyon Evropea. Koza de ko no gustava a los ejipsyanos i a los israelianos, los kualos preferavan tener negostasyonas direktas.

La inisyatifa de Sadat aviya kreado un dilema en Israel. Sadat demandava a los israelianos de dar atrás todas las tyerras konkistas en 1967, kuando eyos insistiyan de trokar las fronteryas del armistrisyo viejo i de no divizar Yerushalayim, presepto baziko de poder tener fronteras defensivles. 2 anyos tomo grasyas a la administrasyon amerikana i a su infatigavle prezidente Carter ke se dediko para parvenir a un kompromiso entre las dos partidas. Es ansi ke se sinyaron los akordos de Septembre 1978 de Camp David i el pakto Ayifto-Israeliano en1979, ke konosemos.

La inisyativa de Sadat anyos despues no fue alvidada, al kontraryo fue un buen echemplo ke dyo koraje a ke los payizes del golfo Persiko de sinyar los akordos de Avraam kon Israel. Grasyas a estos akordos, a sus tornos poko despues, el Maroko i el Sudan rekonosyeron Israel. Es inestimavle para Israel estas muevas relasyones ke le permete de ser respektado en el mundo muzulmano. En despartes del Iran, de la Siria i del Libano munchos otros payizes muzulmanos seguro ke keren establisir buenas relasyones kon Israel, payis de alta teknolojiya i vendedor de gas natural. Esto será kestyon de tiempo.

De otro lado las relasyones kon la India son ekselentes, este enorme payis dezvelopo anchamente sus relasyones komersyalas kon Israel i merka su armamento de el. El 46 por sien de las eksportasyones de armamiento i tekolojiya militar israeliano es destinado a la India. Despues de los akordos de Avraam una kolaborasyon tripartita de formo entre Yerushalayim, Abu Dhabi i Nueva Delhi. Sovre manaderos politikos de la rejyon esta alianza formara las bazas de un muevo orden rejional entre el oeste i el oriente asiatiko despues ke los Estados Unidos dechizeron de retirarsen de esta zona. Una mueva kooperasyon nesesarya será dezvelopada para defender el trafiko de mar en el Golfo, en el okyanus Indiano komo en el Mediteraneo. Remedyos de defensa, drones, lucha kontra el islamizmo teroristo serran organizados.

Kon el apoyo de los Estados Unidos el grupo 12U2 esta purfiyando a ke se kristalize la haveransa stratejika entre la India, Israel i los Emirates, ansi kreando una mueva alianza pro oksidantala ke se apatronara la zona en grande partida. Se espera ke el Ayifto i la Arabia Seudita se ajunten a esta alianza, kon el tiempo.

La amista de oy en dia Indo-Israeliana i la volonta de krear relasyones serkanas, diplomatikas i stratejikas kon los payizes de Golfo nunka serian alkansadas por Israel sin el pakto Ayifto Israeliano sinyado antes 45 anyos, grasyas a un ombre korajozo i vizyonaryo, Anwar El Sadat ke fue asasinado por aver echo la paz kon Israel.

Selim Salti

Fuente: BÜLTEN de los turkanos de Israel – turkisrael.org.il

Check Also

9788410520974 portadaweb2

Muevo livro: EL ESPANYOL SEFARDÍ de Manuel Galvez Ibañez

La primera ovra publikada en Espanya enteramente en espanyol-sefardí desde la ekspulsion de los djudios …

One comment

  1. Un articolo muj interesante. Grasijas a Dr SELIM SALTI.Todo buejno.J.Bauhović-Serbija.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.