LA VIDA DE RITA HAYWORTH trezladado por Simon Geron

Nacida «Margarita Cancino» en Brooklyn/Niu York el 17 Octovre 1918, 100 anyos antes de oy, tomo leksiones de bayle kuando tenia 4 anyos. Dospues en 1927 la famiya se fue a Los Angeles, i eya empesó a lavorar al lado de su padre ke era koreografo, «Eduardo Cansino» nacido en Espanya. Lavoraban en los kafes de reputasión mala. En 1989 en una biografia «If this is happiness» Barbara Leaming eskrivio ke el padre de Rita la abusava seksualmente i Rita nunca kijo revelar la vedrad. Por esta rason era tímida afuera de la shena. Por esta rason tambien tuvo 5 kazamientos ke eshuguaron. Los maridos kierian kontrolarla.

El primero era «Edward Judson» kuando tenia 18 anyos. El era el doble de su edad. Dava a su mujer a kualker persona ke le ayudaba a avansar en su kariera. Rita dezia ke era grasias a él ke pudo entrar en Hollywood. Le daron un kontrato de 6 meses en «Pax Film Corporation» en 1935. Djugo en el rolo de una ekstranjera. El studio troko su nombre a «Rita» de la version «Margarita» i firmo despues un kontrato de 7 anyos kon «Columbia Pictures». Su alkunya tomo el nombre de ija de su madre ke era «Hayworth». No fue solamente el nombre ke se troko. Tenia un pelo duro i preto con buklas. Le dava el aire de una ekstranjera. Por 2 anyos se sometió a un tratamiento primitivo de «Electrolysis» ke mató a kada pelo uno por uno. Kada uno venia a 10 dolares i fue Judson ke pago el precio.

Su fama kontinuo en los anyos 1940 i apareció en el «Life Magazine» en sabanas de satin kon el negligee preto. Esto tomo la atansión del sigundo marido ke era «Orson Welles». En 1946 djugo en el filmo «Gilda» aziendo «Strip Tease». En 1947 se divorso de Orson Welles i en 1948 se fue a ‘Cannes’ i se enkontro ayi kon «Aly Khan» el Prinsipe. Se kazaron en 1949, siendo la primera artista a ser prinsipesa antes de «Grace Kelly». Este kazamiento duró poko tiempo i se torno atras a Hollywood en 1952. A la fin de esta dekada fue remplasada por «Kim Novak». Se dize ke Rita era alkolika i esto eskondían la hazinura de Alzheimer. En su ultimo filmo»Last wrath of God»en 1972 no pudo akordarse de sus tekstos. En 1987 se murió de komplikaciones de Alzheimer. Tenia 68 anyos.