eSefarad Noticias del Mundo Sefaradi
Ver más kuentikos de la Tia de Sulucha >>
-¿Ande te estas indo Sulucha? Ya te vistites i te izites muy luzya. ¿No seya ke te estas indo a una boda?
-No tia, me esto indo a una fiesta de divorsio.
-¡Afuera las karas, leshos de mozotros! En mi tiempo la djente no divorsyava. I si afitava una vez en mil anyos,m no se dizia nada a dingunos. era verguenza.
-No te estrecheyes tiya, oy en diya ay tantos divorsyos komo bodas, i a la djente le plaze englenearse. Kada preteksto es bueno para azer una fiesta. Si no es boda es divorsyo, si no es divorsyo es boda.
Renée Martin
Payis de Gales (Gran Bretanya)
La Lettre Sepharade 38 – Juin 2001
—————————————
*La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
