eSefarad Noticias del Mundo Sefaradi
Ver más kuentikos de la Tia de Sulucha >>
-Tia, oy ke izites dia entero?
-Miri la televizyon i vide una koza muy kurioza. En un kampo grande i vedre, unos mansevos entavan korriendo debasho de la luvya.
-I mas kualo estavan aziendo?
-De vez en kuando se estavan apanyando de las pachas i se estavan kayendo los unos ensima de los otros. Era komo una montanya de ombres, i debasho de la montanya avia un balon. El ke apanyava el balon se fuyiya, i todos detras de el komo lokos. Avia tanta luvya ke la yerva ya se avia echo lodo. estos mansevos se estavan arezvalando i embatakando tanto, ke paresyan unos kimurdjis [1]
-No seya ke estavan aziendo sport?.
-Komo de sport es esto? Me espanti por el dezmazalado ke estava debasho de todos ¿Ken save si se le rompieron los uesos o la naris? ¡Estava korriendo komo ke si tuviera el guerko en el karkanyal!.
-¡No te merikiyes, tia, parese ke esta djente estava djugando rugby! A eyos les pagan tantas paras ke no dan importansia ni al lodo, ni a los uesos rotos.
-Sulucha, yo no esto entendiendo este sport de lokos. ¡Amanyana vo mirar otro program!.
[1] (Kömürcü en turko) Vendedor de kimur (carbón)
Renée Martin
Payis de Gales (Gran Bretanya)
La Lettre Sepharade 35 – Septembre 2000
—————————————
*La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
