LA SAVOR DE PENSAR A LO KE BIVI… por Sal Amira: SALAMONIKO

AGUSTOS 1945>>>

Oy es el diya ke ya estamos prepadados para viyajar a ESTANBOL.

Demprano la demanyana la tiya FORTUNE en el patyo de la kaza ya estava preparando la dondurma /yelo/ice cream para ke el onkli
SOMOEL la venda oy, durante el diya kon su arabayika de ruedas de bisikleta.

ESTE PATYO DE LA KAZA DE ONKLI SOMOEL ES TAN ERMOZO… Kuando esto aya me parese ke esto en Ganeden.

Me asenti en frente de eya kon muncha kuryosita para ver komo lo aziya. Vi ke primero buyo la leche, mesklo a la leche kaymak (krema) i unos polvos ke yo no se sus nombres.

Kuando buyo la leche ya vide ke le metyo bastante asukar. En un silindro grande metyo aryento BUZ/YELO i bastante sal, dentro de este silindro grande kon buz metyo otro silindro mas chiko, i aryento de este segundo silindro metyo toda la leche biyen preparada.

Ensima del segundo silindro metyo un kapak/kuvriyerto buen apegado kon un palo ensima ande kon este palo se puediya darle buelta al silindro.

La tant FORTUNE dospues de darle varyaz bueltas al silindro me yamo para ke yo le dyera bueltas a su lugar para ke eya lo vista a mi ermaniko YAKO para el viyaje.

Ayer la tadre dospues de komer fuimoz kon papu YAKO kon un payton a la kavane ande estava asentado SUPURUNTUCU MEHMET Efendi para kovrarle parte de la araba i 2 kavayoz ke le deviya.

Kuando entrimos a la kavane, todos ke estavan asentados pishin se alevantaron a bezarle la mano de mi papu porke el era un kahraman/heroe ke guerreyo allado de MUSTAFA KEMAL PASHA para salvar la Turkiya de los payises ke la atakavan para dividirselan entre eyoz.

Sal Amira
CHANAKKALELI, EN MIAMI USA.

Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro