eSefarad Noticias del Mundo Sefaradi
Una Maz Bova De La Otra
Aviya de ser en el payis de Teyman un djudyo tan prove ke todo su byen era dyez gayinas. Un diya, kuando Pesah se estava aserkando i vyendo ke su kaza estava vaziya, le disho a su mujer:
«Mujer, toma a estas gayinas para el charshi i vendelas. Ansi, kon sus para, miraremos de merkar de komer i un poko de vistimyenta para la fyesta.»
I la mujer se depesho para azer el dezeo de su marido. Metyo las gayinas en un paniri, i se metyo en kamino para el charshi.
Ayi tres bazlambaches se aserkaron de eya, i le demandaron:
«Estas gayinas son para vender?»
«Si, por siguro,» les respondyo. «Es por esto ke las trushi.»
«I kuanto es sus presyo?»
«Syen paras,» les respondyo.
Vyendo ke aviya mueve gayinas i un gayo, los bazlambaches le disheron:
«Mujer, ya somos prontos para pagarte lo ke demandas. Solo, no tenemos kon mozotros esta toda moneda. Vamos a tomar las gayinas kon mozotros, i te vamos a deshar el gayo. De este modo no te vas a merikiyar achakes ke no tomates tu moneda. Porke vas a tener el gayo por prenda.»
«Ya es muy bueno,» les respondyo la mujer.
En esto, le tomaron las gayinas, deshando a la mujer sekandose en asperandolos. Kuando ya se izo de noche, i vyendo ke no aviya ses seda de eyos, eya fue ovligada de aboltar a su kaza sin la para.
«Mujer! Ande estan las gayinas?» demando el marido.
«Ya las vendi,» le respondyo.
«I ande esta la moneda?»
«Los ke las merkaron me prometyeron de trayerla. Entretyempo, tenemos el gayo por prenda.»
En oyendo esto todo, el marido se travo los kaveyos i grito:
«Mujer, el gayo es muestro, i no les apartyene. Ke karar de bova arastada sos. Mereses una haftona buena! Ma, antes de esto, va tomar mi vara i va kaminar en el payis para mirar si ay una otra mujer bova koma ti!»
I ansi a la manyana, el ombre se metyo en kamino. Verso la tadre arivo a un kazal ande moravan djudyos. Entro al kal i empeso a orasyonar kon toda la djente. Kuando la orasyon del Arvit se aviya eskapado, el rabino le demando:
«Ken sos i ande te kedaras esta noche?»
El ombre le dyo su mano i disho:
«Penso pasar la noche en durmyendo en el kal, porke no tengo ande irme.»
«No se tyene oyido ke en muestro kazal un djudyo no tenga ande irse a echar,» respondyo el rabino. «Puedes vinir a mi kaza, i durmir ande mi si te plazera.”
Ansi, el ombre fue invitado a la kaza del rabino, i estuvo unos kuantos diyas ayi komo musafir.
Un diya kuando el rabino aviya salido de kaza para reglar unos echos, el muestro oyo a las mujeres de kaza avlando entre eyas en la kamareta dallado:
«Mama, mama,» disho la ija del rabino, «tuve un suenyo.»
«Ke modo de suenyo?» demando su madre.
«Me sonyi ke me kazi kon el musafir i paryi un ijiko,» respondyo la ija, i kontinuo:
«Kuando lo tomi al ijiko al pozo para lavarlo, me se arezvalo de la mano, kayo al pozo i se aogo.”
«Buena desgrasya!» grito la madre. «Kualo se puede azer agora?»
«Alavay si lo saviya,» respondyo la ija.
En esto las doz mujeres se asentaron yorando, fregando sus manos i pensando fina ke la mama salto en dizyendo:
«Oye ija, ay solo un kamino de salir de este embrolyo. Vamos a tomar toda la parayika ke tu padre arivo a arekojer i la vamos a dar al musafir. Puedeser ke se apiyadara de mozotros, i no mos tomara a djuzgar.»
«Si madre, si,» disho la ija. «Esto parese ke mos salvara.»
En este momento, el musafir ke aviya oyido todo empeso a yamar:
«Mujeres bendichas, ya no vino la ora del dezayuno?» I kuando le servyeron, les demando:
«Komo puedeser ke no veygo en dingun lugar a mi ijo chiko? Trayeldolo ande mi, para ke pueda komer kon mi.»
«El Dio ke moz kudye!» respondyeron las mujeres. «Tu ijo nunka puedera mas komer kon ti.»
«Kualo?!» s’eksklamo el ombre. «No me dirash ke se aogo en el pozo!»
«Kualo es ke puediyamos azer?» le repondyeron. «Ansi kijo el Dio.”
«Regreto muncho,» disho el ombre. «Esto no lo puedo deshar pasar ansina i sin dinguna indemnidad.»
En esto, las doz mujeres se fueron i le trusheron las ekonomiyas del rabino, syen paras en moneda kontante. El muestro las tomo, las saludo i partyo de la kaza.
Kuando el rabino torno a su kaza, topo a su mujer i a su ija yorando i kafrando.
«Kualo es ke voz afito?» les apunto.
«No demandes es mijor!» respondyo su mujer. «Muestra ija se sonyo ke se kazo kon el musafir, le paryo un ijo, lo tomo el ijo al pozo para lavarlo, i el ijo se le arezvalo de sus manos, se kayo al pozo i se aogo ayi. Tanto mos espantimos de lo ke su padre mos puediya azer ke le dimos todas muestras ekonomiyas. Grasyas al Dio, tomo la moneda i partyo!»
Kuando el rabino oyo a esto todo, empeso a saltar ariva i abasho, i gritando:
«Ke el guerko voz yeve! Nunka no oyi en mi vida mujeres tan bovas!»
Kuanto al musafir, el vino a su kaza i disho a su mujer:
«Mujer, el Dio te guadro de una haftona, porke topi a otras mas bovas de ti!»
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
«….syen paras en moneda kontante….» y un gayo !!