eSefarad Noticias del Mundo Sefaradi
«Tres konsejikos de Djoha»
«Ya te trokates en profeto!»
Djoha kijo ganar paras. Se demando de si para si:
«Kualo es ke tengo de azer?«
Bushko, bushko, i no topo lavoro.
Ensupito, le vino una idea. Se hue a los kampos, i tomo kanyo de vaka. Aspero fin’a ke se seken.
Despues ke se sekaron, tomo un kuchiyo i korto los pedasos del kanyo en forma de gato. Echo en riva ajo i polvo de asukar, i se metyo a venderlos en el merkado en gritando:
«Kada uno ke komera un piskito de estos gatos, se troka en profeto en el mizmo momento! Kada uno ke komera un piskito de estos gatos, se troka en profeto en el mizmo momento! «
Toda la djente ke lo oyeron, i ke se kijeron trokar en profeto, merkaron pishin todos los gatos.
Uno de estos, kuando lo gosto, lo eskupio i grito:
«Esto no es gato! Es kanyo de vaka!«
Le respondio Djoha:
«Vites, komo ke ya te trokates en profeto!«
—————————————————————
Gad Nassi
——————————————————————————————————-
Agua por Karne
Un diya, la madre de Djoha lo mando a merkar karne ande’ l karnero, le dyo la para en la mano i le enkomendo:
«Metetelo bueno en tu kavesa ke kale ke traygas karne eskojida i savroza!«
Despues de una ora, torno Djoha a kaza kon una kupa yena de agua.
Se ataganto su madre:
«Komo de koza es esto? Karne te mandi a komprar i me trushites agua!«
Le respondio Djoha:
«Me hui ande’l karnero i le demandi karne de la mas eskojida i de la mas savroza. Me dyo un pedaso de karne i me disho: ‘Na una karne komo kezo, la mas mijor ke egziste!’
De ayi me hui ande’l kezero. Le demandi de darme un pedaso del kezo de lo mas alavado. Disho el kezero: ‘Na el kezo el mas alavado ke egziste. Esta komo azyete!’
Despues me hui ande el azyetero i le dishe: ‘Yo kero azyete!
Me respondio el azyetero: Toma! Este azyete es klaro komo la agua.’
I, Por esto te trushe agua.«
————————————-
Del folklor de los djudyos de Maroko
Gad Nassi
——————————————————————————————————-
Mansanas en el Sako
Afito un diya ke Djoha se topo en una guerta de mansanas. Miro a su entorno. Bushko bueno bueno i se rendio kuento ke el proprietaryo de 
la guerta no esta en medyo
En esto, empeso a arankar las mansanas i a enkasharlas en un sako grande, ke aviya trayido kon el
Kuando el sako estava yeno bueno bueno, se aparejo a fuyirse. Ma, en supito el proprietayo de la guerta se aparo en frente de Djoha
«Kualo es ke bushkas aki?» le grito kon sanyo
«Hmm!…» respondio Djoha. «Es el burasko terivle de la demaniana ke me izo bolar iarastar aki…»
«Ke sea ansina. I, ken fue ke aranko las mansanas?» demando el proprietaryo»El ayre fuerte del burasko!» respondio Djoha
«Ke sea ansina! I, ken fue ke las enkasho al sako?» demando de muevo el proprietaryo
Djoha se arasko los kaveos, i respondio despues de aver pensado un poko
«…Hmmm!… Kreete ke i yo me lo estuvo pensando a esta koza estranya i no supi topar la repuesta
——————————————————-
Del folklor de los djudios de Levanon
Gad Nassi
——————————————————————————————————-
Gad Nasi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
