eSefarad Noticias del Mundo Sefaradi
Los Papazes i el Azno de Djoha
«Na! Una letra para ti!» Ansi, se avia adresado el mesajero del governor a Djoha, entero enkantado.
«Una letra para mi? Ma, parakualo esto!» respondio Djoha, en tomando la envelopa en sus manos, i aboltandola los ojos enteros aviertos.
Resivir letra era una koza rara en akeos tiempos, porke muy poka djente savian meldar i eskrivir. Orozamente, Djoha apartenia a los ke ya se avian ambezado a meldar.
«Bueno! Meldala a esta letra, i no me agas diritir!» salto la mujer de Djoha.
«Meldala!» disho i el mesajero, ke de mizmo, no savia meldar.
Djoha espajo su garganta en tosiendo i se metyo a meldar:
«Tres papazes, todos savios, estan aktualmente vijitando muestra sivdad. Tienen tres kestiones ke keren pozar a muestros savios. Sos invitado a un banketo organizado a sus onor.»
Entonses, Djoha salto a su azno, i se dirijo al konak del governor, i el mesajero detras de el.
Kuando supo ke la kontestasion de saviduria se iva azer antes del banketo, Djoha ya se kalmo, porke puderia somnolar despues de komer i devia ser enteramente espierto para afrontar a los papazes.
«Na! Aki esta Djoha, el savio!» saltaron los papazes, en viendolo.
«Va pozar la primera kestion,» disho uno d’entre eyos, i adjusto:
«Ande es el sentro de la tierra?»
En esto, Djoha apunto kon su pye la trasa deshada por la unya de su azno:
«El sentro de la tierra es egzaktamente basho la unya de mi azno.»
«Es ke estas siguro?» demando el papaz.
Djoha sakudyo sus ombros:
«En kavzo ke usted no esta siguro, no tiene ke de mezurarlo. Si en kavzo ke su mezura amostrara un lugar mizmo de un puso mas lesho del lugar ke amostri, sera siguro ke usted es maz savio de mi.»
El papaz estuvo mirando a la trasa de la unya del azno. Sakudyo sus ombros i izo sinyo al papaz segundo para ke poza su kestion.
«Mi kestion es,» disho el papaz, i kontinuo:
«Kuantos estreyas ay en el sielo?»
«El mizmo numero de pelos ke tiene mi azno.»
«Komo lo puedes provar?»
«O! Es muy simple. Si usted se esta duvdando de mi repuesta, puedera kontar las estreyas del sielo, i despues, kontar los pelos de mi azno. I, si topara un solo pelo o una sola estreya manko o de maziya, toda la djente de muestro payis savera ke usted es muncho mas savio ke mi.»
Ansi, i el segundo papaz sakudyo sus ombros, i paso la palavra al treser papaz, ke era el maz importante d’entre eyos:
«Djoha Efendi! Mi kestion es muy simple. Kuantos pelos ay en mi barva?» I, aferro su barva i la frego.
«Usted tiene razon,» respondio Djoha. «La repuesta a esta kestion es muy simple. La barva de usted tiene el mizmo numero de pelos, ke la kola de mi azno tiene.»
«Komo lo puedes provar?» demando el papaz.
«Siguro ke usted tiene todo el dirito de duvdarse. No le keda mas de empesar a arankar los pelos de su barva uno a uno, kundo i yo va arankar uno a uno los pelos de la kola de mi azno. I, si kedara un pelo de maziya o de manko en su barva, o en la kola de mi azno, toda la djente savera ke usted es mas savio de mi.»
El papaz aferro de muevo su barva, la frego, i se kedo entero mudo.
En esto Djoha salto:
«I, kuando es ke se va empesar a komer?»
—-
Gad Nassi
Ilustrasion: Roz Kohen
———————————————————————
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
Solicito mas información de Gad NASSI YA QUE MI MADRE SE LLAMAVA SOL PALOMBO NASI ATTE ISAAC