eSefarad Noticias del Mundo Sefaradi
«Kon mi Poder, Todo se Puede»
Un diya, la madre de Djoha le disho:
«Ijo presyado, ya’y muncho tyempo ke tu estas sin lavoro. Avre un orno i empesa a lavorar. Es un lavoro fasil i puederas reushir.»
Djoha izo asigun el konsejo de su madre. Merko un orno i se metyo al lavoro.
En akel tyempo, era de uzo de traer tipsines de komida al orno para kozerlas.
El primer kliente trusho gayina inchida de aroz i demando de kozerla en el orno.
Despues de medya ora, paso de ayi el kadi de la sivdad i demando a Djoha:
«Ke ermozo de golor esta saliendo de aki! De ande es ke esta viniendo?»
«Esto es la golor de la gayina ke un kliente metio al orno,” respondio Djoha.
«Kitala i mola komeremos,» disho el kadi.
«No lo puedo azer esto! I ke repusta dare a mi kliente?» respondio Djoha.
«Kon mi poder, todo se puede,» disho el kadi. Se komyo un pedaso godro de la gayina. Desho los guesos i se empeso a ir.
«Komo de koza es esto? El kliente no se va kreer en mi!» grito Djoha.
«No tengas kargo. Esto no es tu echo. Yo va enderechar todo kuando tu kliente viendra a kesharse ande mi,» respondio el kadi.
Djoha se alegro de saver ke ya se avia topado un remedyo. Lo yamo atras al kadi i los dos endjuntos se metieron a komer el kusur de la gayina i desharon en el tipsin todos los guesos.
Despues de dos oras, vino el kliente.
«Na, ya vine a kovrar mi tipsin. Dame mi gayina!»
Djoha le respondio:
«Kon el poder del Todo Poderozo, todo se puede: la gayina desho sus guesos i se bolo!»
El kliente se ensanyo buen karar. Lo aferro a Djoha i le dyo una haftona buena.
Djoha empso a fuyirse, i el kliente korriendo detras, fin’a ke arivaron a un meshkito.
Djoha entro al meshkito i empeso a suvirse en sus eskaleras, i, el patron de la gayina detras. En esto, Djoha salto de la torre del meshkito, se kayo en riva de uno ke estava pasando de ayi, i lo mato. I kontinuo a fuyirse en korriendo.
El ermano de la persona ke la avia matado empeso a korrer detras de Djoha. En su kamino el ermano se chapteyo a una otra persona, i le kito el ojo.
La persona ke se syego de un ojo empeso a korrer detras de’l fin’a ke se chapteyo a un azno. Kijo suvirse al azno. Aferro la kola del azno, ma el azno empeso a fuyirse i su kola se le aranko.
El patron del azno empeso a korrer detras del ke se syego fin’a ke todos arivaron ande el kadi.
El kadi yamo en primero al patron de la gayina, i despues ke lo oyo le disho:
«El Todo Poderozo, puede azer miraklos i maraviyas. Agora, tu deves pagar a Djoha sesh liras de dasyo. Sino seras enkashado por sesh diyas al prezo, porke mos deranjates sin razon.»
El ombre oyo la sentensa sin pueder azer nada. Pago las sesh liras i se hue.
Despues se prezento el ermano de la persona ke fue matado. I ekspliko su kavzo.
El kadi deklaro:
«Para vengarte d’el ke mato a tu ermano, puederias i tu saltar del mizmo lugar kuando Djoha pasaria por ayi. I de este modo lo puederias matarlo djusto komo lo mato a tu ermano. Entretyempo, kale ke pages sesh liras de dasyo o seras enkashado sesh diyas al prezo.«
No teniendo remedyo pago las sesh liras i se hue.
Vino la persona ke se syego de un ojo i prezento su kesha.
El kadi deklaro:
«Agora korrerash uno detras del otro. I si puederas vengarte del ke te kito un ojo en kitandole i tu, el un ojo sera muy bueno. I sino, el te va kitarte el otro ojo. De todo modo, vas a pagar sesh liras de dasyo, o seras enkashado por sesh diyas al prezo.
No teniendo remedyo pago las sesh liras i se hue.
Agora, el kadi estuvo asperando a oyir el kesho del proprietaryo del azno ke su kola se avia arankado. Ma, el proprietaryo no se kesho i se aparejo a irse.
El kadi intervino i le demando:
«Deke no estas prezentando tu kavzo? No keres resivir una indemnitad por el danyo ke te fue kavzado?»
El ombre ke se avia espantado ke i el sera ovligado de pagar sesh liras de dasyo, ya se avia esvacheado de kesharse. Respondio:
«No Senyor Kadi, esto es el poder del Todo Poderozo. El azno desho su
kola i se fuyo…»
——————————————————————————————————–
Del folklor de los djudios de Ayifto
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
