eSefarad Noticias del Mundo Sefaradi
«Djoha vendiendo ichizos i miraklos»
Un diya, Djoha se rendio kuento ke un largo tyempo no aviya ganado un poko de paras.
Despues ke se penso buen karar de si para si, arivo a tomar una desizion i a implementarla.
Se merko un azno. Se empresto de su vizino riko un poko de moneda en plata. Salyo a la kaye kon el azno, i empeso a gritar:
«Este azno solta monedas! Este azno solta monedas!»
I de kuando a kuando empeso a arezvalar pedasos de moneda de la kola del azno, ke estuvieron kayendo i saltando en basho, i Djoha estuvo arekojendolas i enkashandolas a su aldikera.
Kuaji ke todos los kazalinos estuvieron pasando al lado de Djoha para ver a este miraklo. I kedaron enkantados.
«Komo puede ser este modo de koza? Un azno ke solte monedas?» Se estuvieron demandando.
Unos kuantos de estos se desidaron de merkar el azno i de gozarsen de sus miraklos para ganar muncha para. Se adresaron a Djoha i empeso una diskusion fuerte sovre el presyo del azno. Despues de una ora, ya se azieron fit kon Djoha ke aksepto de vender el azno por mil levanim.
Entonses, Djoha les dyo el azno i les dyo los direktivos espesiales para ke el azno solte monedas:
– El azno deve de kedarse solo en una kamareta, leshos de la djente, para ke no lo deranjen kuando esta soltando las monedas. Kale espandir en basho savanas, kavesales i kolchones, para ke el azno se puede asentar en komforto i ke puede soltar mucha moneda. Es defendido de kedar en la mizma kamareta kon el azno. Se puede entrar a la kamareta solo para darle a komer i a bever, i kale pishin salir de la kamareta.
– Kale dar al azno komida para ke tenga salida, para ke las monedas salgan kon un korriente fuerte i presto.
– Solo despues de dos semanas el azno empesara a soltar moneda, i solo despues de dos semanas se puede entrar a su kamareta.
Los ke merkaron el azno, se gustaron buen karar i lo rengrasiaron a Djoha en pagandole los mil levanim. Tomaron el azno i se hueron.
Metieron al azno en una kamareta kon todo el komforto menesterozo, djusto asigun ke djoha les aviya enkomendado, kon savanas, kavesales i kolchones en basho. Le dieron al azno una komida de rejim espesyal para ke tenga salida. Salieron de la kamareta i serraron la puerta.
Djoha se alegro por la ganansia ke tuvo tan fasil. Portanto, no se kontento kon esto, i topo un muevo enganyo: un raton ke puede ser uzado komo pregonero.
Kualo es ke izo? A la demanyana, disho a su mujer:
«Apareja para el dezayuno de midi, gayina en el orno kon patatas!»
Entretyempo, se hue i aferro un raton. Salyo kon el raton a la plasa del kazal, i empeso a gritar:
«Ken kere merkar un raton pregonero? Este raton es kapache de pregonar kada koza asigun la demanda de su proprietaryo!»
En esto, una djentorya grande se arekojo en el entorno de Djoha. Le demandaron:
«Komo puede ser una koza semejante? Raton pregonero?»
Les respondio Djoha:
«Na! Esto mandando al raton ande mi mujer para ke le pregone de aperajar un dezayuno bueno. Gayina en el orno kon patatas. Vozotros sosh invitados a midi a mi kaza a este pranso.»
Kito el raton de su aldikera. Le dyo a entender lo ke devia de pregonar a su mujer i lo mando.
Kuando vino el medyo diya, la djentorya ya se avia arekojido en la kaza de Djoha. I, ke maraviya del Dio, vieron ke la mujer de Djoha aviya aparejado gayina en el orno, djusto asigun ke lo avia enkomendado a la oreja del raton.
Toda la djente se enamoraron de esto, i arogaron a Djoha de venderles el raton.
Djoha les respondio:
«Kale ke me pense bueno bueno sovre esto. Vini amanyana i vos dare la repuesta.»
La djente se hue, i Djoha salio de su kaza para aferrar un otro raton.
A la manyana, la djente vino de muevo ande Djoha, i Djoha les vendio el raton por mil levanim.
Uno de los rikinyones ke merko el raton, se desidio de azer una surpriza al Rey del payis. Se hue a la manyana al palasyo, i le disho al Rey:
«Esto mandando a este raton ande mi mujer, i le esto enkomendando de pregonarla de aparejarmos un pranso real, i Su Majestad se va render kuento el mizmo, ke todo lo ke dishe es verdad, i ke este raton es un pregonero!»
I mando el raton, en avlando a su oreja, todo en estando siguro ke el pranso iva ser pronto.
Despues de tres oras invito el Rey i la Reyna, i todos endjuntos se hueron a su kaza para gozarsen del pranso.
Kuando arivaron a su kaza, vieron ke su mujer no avia gizado mizmo un grano de trigo. El rikinyon demando a su mujer:
«Kualo? No te lo tyene disho el raton?»
«Kualo es ke estas fregando? Ke raton? Ke suenyo es ke te sonyates?»
El rikinyon ya estava para dezmayarse de toda su guerguensya en frente del Rey i de la Reyna.
Al Rey le tomo una riza fuerte, i kon sanyo le reprimando al rikinyon:
«A la otra vez, esto te kostara muy karo!»
Mos aboltaremos agora al azno ke solta monedas.
Despues ke se incheron las dos semanas, asigun ke Djoha lo enkomendo, sus proprietarios toparon ke el azno se avia murido. I, su kadavro estava fedyendo leshana i en riva de su kadavro moshkas bolando.
En esto, se rendieron kuento ke Djoha los avia enganyado. Se desidaron de toparlo i de vengarsen de el.
En sus kamino enkontraron a una otra banda de personas ke se estavan aprestando a arivar en sanyo a la kaza de Djoha. Estas eran akeas ke fueron enganyadas kon el raton.
Las dos bandas izieron un konsulto entre eyos, i se desidieron de vengarsen de Djoha en matandolo.
Ainda no avian arivado a la kaza de Djoha, ke ya lo renkontraron en sus kamino. Lo aferraron, lo ataron i lo enkasharon ariento de un sako grande. Arivaron al bodre de la mar i se aparajeron a echarlo a la mar. Ma, despues se desidaron ke era mijor de atarlo a un arvole para ke este sufriendo muncho mas, i a la manyana de echarlo a las ondas.
Ataron el sako a un arvole i se hueron para aboltar a la demanyana.
Empeso Djoha a gritar:
«No kero ser rey! No kero ser rey!»
Paso de ayi un bandido kon una trupa de kodreros, ke lo oyo.
El bandido se disho de si para si:
«Deke ke no sea yo rey al lugar de este ke este gritando.»
I, empeso a bushkar de ande vinian los gritos, fin’a ke lo topo a Djoha, i le demando:
«Es verdad ke no te keres azerte rey? Si keres, ya te puedo trokar?»
«Si!» respondio Djoha.
Libero a Djoha del sako. Djoha lo enkasho al bandido al sako i lo ato al arvole. Despues tomo sus kodreros, i se alesho de ayi.
A la amanyana vinieron las dos bandas ke se estavan vengando de Djoha. Tomaron el sako i lo echaron a la mar kon el bandido, todo en estando siguro ke Djoha estava ariento del sako.
No paso una semana ke ya lo vieron a Djoha kon una trupa grande de kodreros.
Le demandaron:
«Komo fue ke te salvates de la mar?»
«No savesh ke buendad me izo el Rey de los Pishkados. No solo me salvo de la mar, i me dyo enriva munchas paras kon laskualas merki estos todos kodreros.»
Los vengadores disheron a Djoha:
«Ven yevamos a la mar! Ande el Rey de los Pishkados! »
Los tomo Djoha a todos, enkasho a kada un en un sako, i los echo a la mar, uno detras del otro. I, dinguno de eyos, nunka se abolto de ayi.
——————————————————————————————————-
Del folklor de los djudios de Irak
Gad Nassi
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
