eSefarad Noticias del Mundo Sefaradi
Djoha i el Tosigo
La madre de Djoha kijo ke Djoha se ambeze un ofisyo para ke pude ganar un poko de moneda. Se adreso a un sapatero i le demando de tomar a Djoha komo su empiegado.
El sapatero fue de akordo i empiego a Djoha kon un salario chiko.
Paso unos kuantos diyas, disho el sapatero a Djoha:
«Pesah se esta aserkando, yo kale ke me vayga al charshi para emplear lo de menester. Tu kale ke tengas tino de la butika i sovre todo sovre este par de chizmes! Los apronti para un ministro onorable. Deshi aki i dos tiestos yenas de tosigo. No mires de tokarlos ni por sedaka!»
Portanto i en verdad, no aviya dingun tosigo en estos tiestos. El uno era yeno de moneda i el otro era yeno de miel.
Se asento Djoha i empeso a tener kargo de la butika, i espesyalmente de los tiestos i de los chizmes.
Despues de un syerto de tyempo, vido ke moshkas se estan bolando en riva de los tiestos. Penso Djoha de si para si:
«Si estas mushkas no fueoron firidas i si no se murieron del tosigo, siguro ke i yo ne me va murir!»
Avrio el kapak de uno de los tiestos i enkasho aryento sus dedos i los chupo.
«En mi vida no tengo gostado una koza tan savroza!» se disho de si para si.
Despues se penso:
«Miel no se puede komer ansina sin nada!»
En este mizmo momento estava pasando de ayi una karosa yena de pan fresko i kayente.
«Kon kualo puedera merkar pan?» se demando.
En esto, echo un ojo a los chizmes del ministro. Los tomo i los dyo al vendedor por un pan entero.
Se asento, i se komyo el pan undiendolo al miel.
Despues ke se arto bueno bueno, rompyo los tiestos, se areskunyo las karas, se asento en un kanton de la butika i empeso a yorar a boz alta.
Kuando abolto el sapatero, le salto kongoshas en viendo la desgrasya ke avia afitado.
Djoha empeso a kontar en yorando i mauyando:
«Djusto despues ke te huites de aki, bandidos abashados de la montanya entrararon a la butika. Me aferaron, me mataron de haftona i se arovaron los chizmes del ministro. I yo tanto me espanti de usted, ke kije matarme i komi todo el tosigo ke aviya en los tiestos…»
—-
Del folklor de los djudios de Maroko
Gad Nassi
———————————————————————
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
