eSefarad Noticias del Mundo Sefaradi
MONTAIGNE I SUS RAIZES SEFARADIS:
UN ATADIJO NON REKLAMADO
Durante mi ultima vijita en Toledo, muestros piezes mos arastaron verso un edifisyo ke avia espertado muestra kuriozidad. Kuando echimos un ojo a su interior i mos apersivimos ke era un restorante dekorado de una manera muy rika i partikulara, mos desidimos de dezayunar aya.
La mujer ke tenia kargo de resivir los klientes i de dirijir el sevisio, remarkando muestro intereso, empeso a eksplikarmos ke este edifisyo avia apartenido a la famiya ilustre Lopez. Akodrandome ke la madre de Montaigne era desendiente de esta famiya, le demandi si eya tambien apartenia a esta famiya. La mujer me respondio ke los Lopezes avian deshado antes muncho tiempo la sivdad. Despues, en abashando el tono de su boz i abokando kon diskresion su kavesa, adjusto:
― Eran Hudios!
No puediendo detenerme, me adresi a eya de muevo:
― C’est la famille maternelle de Montaigne? (Es la famiya maternal de Montaigne?)
Su ojos briyaron:
― Oui! C’est exactement ça! (Si, es egzaktamente esto!)
En akeyos momentos, sinti ke estava frisonando de mi para mi. Un sentimiento
————————————————————————————–
Su Asendensia
Michel Eyquem de Montaigne (1533-1592) nasio en el kastilio Montaigne, al lado de la sivdad de Bordeaux en el Sud-Oeste de Fransia. Su padre, Pierre Eyquem de Montaigne, era un komersante prospero i fue governador de la sivdad. Su madre, Antoinette Lopez (de Louppes) de Villanueva, apartenia de la parte de su padre a una famiya de asendensia djudia de Toledo, ke se avia aresentado mas tadre en Portugal. Uno de sus avuelos, Meir Paragon de Calatayud, fue konvertido por fuersa al Katolisizmo en tomando el nombre Lopez de Villanueva. Miembros de esta famiya fueron persekutidos por la Inkizision. Tres de eyos, inkluido su bizavuelo, Pablo Lopez, fueron egzekutidos en un auto-da-fé. Su padre, Juan Lopez de Villanueva, ke avia fuyido la Inkizision, se avia establesido en la sivdad de Toulouse.
Montaigne estudio en el Kolejio de Guyenne en Bordeaux, ke era dirijido por konversos de Portugal, i probablamente en la Universidad de Toulouse, ke era un sentro de disidensia relijioza, i ande los konversos eran aktivos.
Aunke Montaigne i su padre fueron katolikos, su madre i dos de sus ermanos se avian konvertido al Protestantizmo. Fue edukado por su padre, i al pareser, su madre no tuvo una influensa direkta en su formasion. De todos los miembros de su famiya, es solo su padre ke es relatado en su ovra.
Despues de aver terminado sus estudios de derecho, Montaigne fue miembro del Parlamento de Bordeaux. Es solo en 1571, a la edad de 38 anyos, ke se retiro en su kastilio para redaktar su ovra.
Su Ovra
Montaigne es una de las mas importantes figuras del Renasimiento. Su ovra literaria – konosida entanto ke ensayos (essais) – se remarka por su valor filozofika. En proklamando la relatividad de las kreensias, esta ovra se adapta al espirito revolusionario de su tiempo. Markadas por valores umanistas, sus ideas tuvieron una influensa konsiderable en la evolusion de la pensada filozofika i literaria.
El Renasimiento es karakterizado por la ekspansion i el enrikesimiento de la pensada. La forma literaria uzada por Montaigne, el ensayo, es una kreasion suya. Esta forma se adapta de una manera remarkable a la ekspresion direkta de la pensada, sin ke sean reveladas posibles eksperiensas intimas. Su ovra es konsiderada entanto ke una otobiografia. Portanto, es una otobiografia, ke no trata de los evenemientos en sus orden kronolojiko, i ande son dispersadas konsiderasiones sovre la politika, la istoria, la relijion, la edukasion i otros sujetos. Su otor parese adresarse a un amigo serkano en una forma de dialogo.
«Yo mizmo so el sujeto de mi livro; no vale ke pedrash vuestro tiempo sovre una koza tan simple i tan vana.» Ansi se eksprime Montaigne kon umilidad. «La mas grande koza en este mundo es de konoserse si mizmo. Akseptar la kondision umana es akseptar muestras dos partes: el puerpo i la alma. No entanto ke esklavo i maestro, ma entanto ke dos partes relativamente iguales ke deven koegzistir en paz.«
Asigun Montaigne, la persona no puede ser muy diferente de lo ke es naturalmente; si akseptamos muestras limitasiones sin sanyo, puedemos i mantener muestra dinyidad de ser una kreasion umana i tomar plazer de la vida.
El septisizmo es un otro aspekto de su filozofia. El sulinya la valor arbitraria i relativa de las kreyensias, de las leyes i de los kustumbres. Montaigne es famozo por la fraza “Que sais-je?” ke eksprima la inkapachidad de la pensada umana de konoser la verdad absoluta.
Aparte la influensa de su konsepsion sovre la realitividad de las kreyensias, sus esforsos de konoserse, para mijor konoser la natura umana, reprezentan los primeros pasos verso la introspeksion de la vida psishika, ke se dezvelopara en Evropa en los siglos vinideros.
«Formar muestro karakter es muestro dever, i no kompozar livros; venser, no batalias i no provinsias, ma orden i trankilidad en muestro komportamiento.» Montaigne es kontra el dogmatizmo relijiozo, kontra la intolerensia verso las kreyensias i sus opresion. En kondanando la vanidad de las gerras i de las persekusiones, la ideolojia de Montaigne se konfronta kon la ideolojia de la Iglezia katolika de su tiempo.
El Renasimiento es karakterizado en mizmo tiempo por una revolta kontra el absolutizmo del Katolisizmo. Este absolutizmo es imprenyado por las atrosidades de la Inkizision. Protestantes ke se opozan a la supremasia del Katolisizmo, son persekutidos i masakrados eyos tambien. En el anyo 1572, kuando empesa su ovra, esbrocha el masakro San Bartolomeo. Miles de protestantes son salvajamente matados. Sovre esto Montaigne eskrive ke: «No egziste ostilidad ke depasa akeya del Kristianizmo.«
Montaigne tiene una konsepsion del Dio entanto ke un Dio djusto, ma distante. La relijion i la vida de kada dia deven de ser dos kozas distinktas i separadas. Aunke era katoliko, Montaigne fue, grasias a su moderasion, el konsejero de Henri IV, el lider de los protestantes. De mizmo fue nominado mas tadre Governador de Bordeaux, porke para este posto avia menester de un katoliko respektado por los protestantes, ke estavan menasando la sivdad.
Su aktitud verso los djudios
En sus ovras, Montaigne se eksprime de una manera favorable o neutra verso los djudios. Kualifika de atrosidad las persekusiones de la Iglezia Katolika en Portugal, ainda mas, por ser kometidas al nombre de la Fey. En uno de sus ensayos(*) se remarka este pasaje:
«…A ser ke los Reyes de Castilla avian arondjado de sus tierras a los djudios, el Rey Juan de Portugal les vendio por ocho kruzeros un refujio por un sierto tiempo, kon la kondision ke kuando viendria el tiempo, eyos devrian irsen de ayi, i les prometio de darles naves para yevarlos a la Afrika. Kuando vino el dia fiksado, les izo saver ke los ke no ovedeserian, serian vendidos komo esklavos; ma las naves ke les fueron trayidas eran de las mas chikas; i los ke se embarkaron fueron tratados de una manera muy negra i kruela por los marineros, ke aparte de otros aktos de indinyidad, los izieron navigar por adelantre i por atras, asta ke konsomaron todas sus komanyas, de manera ke fueron ovligados de merkarlas de eyos kon un presio tan karo i durante tan muncho tiempo, ke se kedaron solo kon sus kamizas. Una vez ke la novedad de esta inumanidad fue reportada a los ke avian kedado en el pais, munchos de eyos akseptaron el esklavaje, mientres ke otros se amostraron komo ke uvieran trokado de relijion. Kuando fue koronado Manuel, el suksesor de Juan, en primero fue tolerante, ma despues troko su idea i les ordeno de salir del pais, en asinyando tres portos para sus pasaje. El esperava ke mizmo si, a favor de la libertad, avian refuzado de konvertirsen al Kristianizmo, la difikultad de ekspozarsen al rovo de los marineros, de abandonar un pais al kual ya se avian auzado, abandonar sus rikezas para ir a rejiones ajenas i deskonosidas, los azeria tornar atras.
Ma viendo ke su esperensa no se kumplia i ke la mas parte era desidada a viajar, el serro dos de los tres portos prometidos, para ke la largor i la inkomodidad del kamino aga renunsiar a lo menos a una parte de entre eyos; i tambien para ke, amontonandolos a todos en un lugar, pueda egzekutir kon mas komodidad el plano ke avia aprontado: de arankar a todas las kreaturas de menos de katorze anyos, de konvertirlas i de yevarlas leshos de sus vista, a un lugar ande serian edukadas asigun la relijion muestra. … Esto kreo un spektakolo orible: komo konsekuensa de la afeksion natural entre los djenitores i sus kreaturas, i de mas, del atamiento a sus viejas kreensias, munchos padres i madres se dieron la muerte, i para dar un egzemplo mas fuerte, echaron sus kreaturas a los pozos, para evitar el kumplimiento de este dekreto…»
El ensayo kontinua en referandose a los djudios de Portugal ke se konvertieron al Kristianizmo:
«Kon tiempo kuando el limito de tiempo ke les fue akordado ekspiro, estos se rendieron en esklavaje. Algunos de eyos se izieron kristianos; de la fey de estos, o de sus prosperidad, ainda en muestos dias, sien anyos despues, muy poko de portugezes se pueden asigurarsen; mizmo ke el kostumbre i la largor del tiempo son los konsejeros los mas efikases por este modo de trokamientos, mijor ke todo modo de obligasion…»
En su «Diario de Viaje« (Journal de Voyage), ke es su ultima ovra, Montaigne se refera munchas vezes a los djudios de Italia, esta vez de una manera neutra i detashada. El fakto ke vijito las sinagogas, ke estuvo prezente en siertas de sus seremonias relijiozas i ke konverso kon munchos de eyos, atira muestra atension. Un dia de Febrero 1581, es testigo de un karnaval burlesko en Roma, ande djudios, ijikos, viejos medio dezmudos i hazinos son rempushados kon aznos, kavayos i palos de una manera umiliante, para ke korren en la kaye yamada El Corso. Los ke arivan los primeros a la fin de esta korrida resiven una rekompensa de pedasos de ropa. Este evenemiento es reportado de una manera muy breve, en presizando ke no se toma dingun plazer de verlo.(**)
Un Atadijo Non Reklamado
El fakto ke miembros de su famiya avian preferado el Protestantizmo al Katolisizmo, es probablamente un kompromiso kontra la koersion relijioza. Las konsiderasiones de Montaigne sovre la Inkizision en Portugal, revelan su piadad i mizmo una sierta empatia verso los persekutidos. Portanto, asigun ke fue remarkado mas ariva, aparte de su padre, Montaigne no relata en su ovra dingun miembro de su famiya. Las razones de este silensio fueron el objeto de siertos komentarios. Asigun una ipoteza, no es siguro si Montaigne supo bastante sovre su asendensia maternal o si se intereso sovre esto. En konsiderando la kuriozidad intelektuala ke karakteriza Montaigne, esto no parese probable. Asigun una segunda ipoteza mas repandida, esto es la prova ke Montaigne era profundamente preokupado por su identidad djudia i se empidio de eksprimirse sovre esto achakes de la aversion avierta ke egzistia en akeyos tiempos kontra los djudios i los konversos.
Probablamente konversos en el enturaje de Montaigne, kontinuaron a konservar elementos del Djudaizmo, i Montaigne lo avia konstatado. Munchas de sus ideas son kompatibles kon la vida espiritual i intima de los konversos(***).
Todo en konsiderando ke un sentimiento de apartenensia al Djudaizmo se avia dezvelopado en Montaigne, no es posible de determinar su sinyifikasion egzakta i la manera en lakuala pudo influensar la orientasion de su pensada.
———————————————————————————————-
(*) «Que le goust des biens et des maux despend en bonne partie de l’opinion que nous en avons», Livre I, Ch. XL.
(**) Zinguer, Ilana, «Montaigne et le carnaval de Rome», Les Cahiers du Judaisme, 11, (Paris: 2001-2002), 4 -10.
(***) Jama, Sophie, l’Histoire Juive de Montaigne, Flammarion, Paris, 2001. Esta ovra trata de diversos aspektos de Montaigne ke pueden ser referados a sus atadijos kon el Djudaizmo.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
